Venres 29 Marzo 2024

‘A medicina non cura todo, pero as pseudociencias non curan nada’

A pregunta realizada ante a Comisión Europea por parte da eurodeputada galega Lidia Senra, na que se cuestionaba a seguridade das vacinas, desatou unha gran vaga de reaccións. Algunhas asociación, como o Círculo Escéptico, composto por preto de 200 persoas, científicos de numerosas disciplinas, pero tamén xornalistas, avogados, mestres, etc. e, en xeral, persoas interesadas pola ciencia, criticaron con dureza a cuestión que presentou Senra. A entidade, que preside o biólogo galego Vicente Prieto, intervén activamente na divulgación do pensamento científico, crítico e racional e na denuncia de prácticas pseudocientíficas. GCiencia conversou con Prieto sobre a polémica xerada estes últimos días.

– De onde vén esta actitude escéptica cara as vacinas?

Publicidade

Demostrouse que a relación entre vacinas e autismo era un fraude, pero o dano xa estaba feito

– Hai antivacinas desde que comezaron as vacinas, como pasou con todos os avances científicos, que sempre tiveron os seus detractores. No caso das vacinas, xorde a raíz dun artigo fraudulento publicado en 1998 en The Lancet por un médico chamado Andrew Wakefield, no que relacionaba a vacina triple vírica co autismo. A revista retirou o artigo anos despois por numerosas irregularidades e porque se demostrou que Wakefield tiña un gran negocio montado sobre o asunto, pero o dano xa estaba feito. En Europa, sobre todo no Reino Unido, baixou o índice de vacinación e aumentaron, como non, os casos de enfermidades como o sarampelo. En Estados Unidos, Jim Carrey e a súa parella, que tiña un fillo con autismo, comezaron a mobilizarse en contra dos supostos danos das vacinas e gañaron bastantes adeptos á causa.

– Coas vacinas arguméntase que unha das razóns do avance da ciencia é cuestionarse a si mesma, que forma parte dela.

– Precisamente iso é o que se fai coas vacinas. Avalíanse, mellóranse, próbanse continuamente. E alén disto, abonda con ver os datos que aporta a OMS: calcúlase que entre 2000 e 2015, as vacinas evitaron 20 millóns de mortes por sarampelo, e aínda así, o ano pasado houbo 89.780 mortes por esta enfermidade, e este ano levamos unhas 40 en Europa. E isto é pola irresponsabilidade e o egoísmo da xente que decide non vacinarse, porque rompe a inmunidade de grupo. Hai xente que non se pode inmunizar porque é alérxica a algún dos compostos das vacinas, ou ten enfermidades autoinmunes, e está protexida destas enfermidades porque o resto da poboación si que está inmunizada. Pero se a xente deixa de protexerse, as persoas que non se poden vacinar están en perigo.

– Antivacinas, homeopatía, chemtrails, guerra climática… Hai moitos frentes abertos.

– Internet é unha ferramenta marabillosa para adquirir coñecementos, pero tamén espalla ideas moi perigosas e auténticas tonterías. A xente ten dereito a crer o que queira, pero nós tamén temos dereito a dicirlles que están equivocados, e a argumentalo.

– E por que ‘triunfan’?

“Nin todos os cartos do mundo poderían comprar a ética e o bo facer de todos os profesionais sanitarios”

– Hai moitas razóns. A medicina non cura todo, pero a pseudociencia non cura nada. E se a medicina non che dá solucións, o charlatán sempre vai estar aí para dicirche que ten solucións; e a xente agárrase a quen lle ofrece esperanzas, porque crer consola e conforta. O que queda claro é que o método científico tense que impoñer. Porque nin todos os cartos das farmacéuticas do mundo poderían comprar a ética e o bo facer dos médicos, os investigadores e todos os profesionais sanitarios do mundo que traballan para mellorar a vida da xente.

– E como se responde a isto?

– A nós chégannos todos os días noticias tremendas. Non só en portais de pouca credibilidade, senón tamén en medios públicos, como demostra o caso de Cárdenas en TVE. E o que procuramos é argumentar con evidencias científicas os erros destas actitudes. Nós non obrigamos a ninguén a pensar coma nós, senón que simplemente queremos que pensen por si mesmos, que razoen e saquen conclusións. Pero é moi difícil facer dubidar a alguén que está convencido. Outra vantaxe das pseudociencias é que son fáciles de comprender, teñen explicacións sinxelas; dinche que tes un desequilibrio enerxético ou un problema co karma, e ademais estes gurús saben como solucionalo. Pero ás veces é moi complicado para un médico explicar determinados problemas, e máis cando non teñen unha solución total.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A UVigo reivindica no Día Mundial da Auga a importancia do seu acceso universal

A universidade impulsa a concienciación través dunha serie de pódcast con nenos e nenas e dun concurso escolar de microrrelatos

Chegan as vacinas contra o melanoma: como funcionan?

As compañías Moderna e Merck xa comezaron os seus ensaios clínicos para desenvolver a terapia, que podería estar lista en 2025
00:03:09

As patacas teñen lingua propia: o vídeo dunha galega finalista nun certame de divulgación

A investigadora da Misión Biolóxica de Galicia Lucía Martín Cacheda presenta unha peza audiovidual sobre a comunicación química das plantas

A eternidade por fin comeza un luns

Artigo gañador da VI edición do IGFAE C3, o concurso de comunicación científica do Instituto Galego de Física de Altas Enerxías