A adega Terras Gauda e o grupo de Viticultura da Misión Biolóxica de Galicia, adscrita ao CSIC, acaban de presentar un proceso pioneiro para potenciar, de xeito natural, as propiedades saudables dos viños. A través dun estudo científico conseguiron elevar a concentración de flavanoles, uns compostos con propiedades antiinflamatorias e antioxidantes en trastornos do metabolismo.
Os investigadores da MBG realizaron unha análise da concentración destes fenoles nas tres variedades blancas que produce Terras Gauda: albariño, loureiro e caíño branco. Nalgúns casos, a través dun proceso natural de cultivo, conseguiuse aumentar ata mil veces o nivel de flavanoles, sen que se viran afectadas as propiedades organolépticas do viño.
De feito, segundo sinala Emilio Rodríguez, director enolóxico da adega, “nalgúns dos paramétros de cata analizados, pódese considerar que se melloran”.
Os traballos enmárcanse dentro do proxecto Biofunciogal, no que participan varias empresas do sector vitícola e outros grupos de investigación, como o departamento de farmacoloxía da USC.