Xoves 28 Marzo 2024

Senseitrade, un termómetro bolsista das redes sociais creado en Galicia

Hoxe en día, unha simple mensaxe en Twitter ou Facebook pode xerar auténticos terremotos económicos e políticos. As empresas, os grandes fondos bolsistas e os pequenos inversores procuran, cada vez máis, estar ao tanto do que se di, se le e se fala nas redes sociais. Son precisas, por tanto, novas ferramentas que axuden a comprender mellor todo este entorno.

Un grupo de emprendedores galegos viu unha oportunidade se conxugaban o mundo bursátil coas redes sociais, e puxeron en marcha Senseitrade. Deseñaron unha aplicación para dispositivos móbiles que analiza as mensaxes publicadas en Internet e ponas en relación coas posibles flutuacións no valor das accións. David Conde, CEO da empresa, sinala: “Viamos que un tuit ou unha opinión dun inversor publicada nas redes facía mover os mercados”. Así, despois dunha ampla experiencia na banca privada, decidiu iniciar este novo proxecto.

Publicidade

Moitos estudos amosan a “relación entre a bolsa e as redes sociais”, sostén David Conde

“Hai moitos estudos que amosan a relación entre o que se publica nas redes sociais e o valor das accións”, di Conde. Sinala, en concreto, un estudo da universidade de Munich que sostén, despois de analizar 250.000 tuits, que se pode predicir a evolución dos valores bolsistas cun 87 por cento de acerto. Do mesmo xeito, explica que existe tamén un 80 por cento de relación entre o volume de mensaxes e o volume de movementos sobre unha determinada acción.

Así, a través da compilación dos mensaxes e unha análise semántica dos mesmos, desenvolveron unha aplicación xa dispoñible para iOS e Android que conta con tres apartados diferenciados.

Pantalla de Senseitrade.
Pantalla de Senseitrade.

“En ‘Top Values’ aparecen as compañías máis comentadas, sexa para ben ou para mal”, explica David Conde. Na sección ‘Alertas‘, a aplicación avisa ao usuario de cando pode ser un bo momento para mercar ou vender determinadas accións. Por último, esta a sección ‘Trader‘, na que se poden probar os indicadores que aporta a aplicación e competir nos torneos que organizan desde Senseitrade.

Desde a posta en marcha da versión definitiva, en novembro de 2016, Senseitrade xa conta con arredor de 10.000 descargas e está en constante mellora. A proposta xa foi seleccionada na aceleradora ViaGalicia, da Zona Franca de Vigo e a Xunta de Galicia, e participou en varias iniciativas da Axencia Galega de Innovación, como o programa Principia, a través do que recibe un apoio para a contratación dun investigador.

O xerente da compañía sinala que xa traballan en máis prestacións. Destaca, entre elas, a creación dun axente bolsista en liña para que os usuarios de Senseitrade poidan traballar con accións reais, mercando e vendendo directamente desde a propia aplicación. Deste xeito, incrementarían os ingresos, que polo de agora proceden de unha modalidade de subscrición a través da cal os usuarios reciben información en tempo real.

A empresa conta actualmente con catro socios e tres empregados, que traballan entre o polígono de Porto do Molle (Nigrán) e a Tecnópole de San Cibrao das Viñas.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde

Identificado un novo campamento romano na fronteira entre Galicia e Portugal

Un equipo de arqueólogos detecta un posible recinto fortificado de tres hectáreas de extensión datado entre os séculos I a.C. e I d.C.