Únete á nosa canle de Whatsapp
Galicia afronta a primeira semana de decembro co paso dun anticiclón que dará unha pequena tregua á chuvia. As altas presións abrirán os ceos de maneira transitoria durante a xornada do martes, xa que o mércores o territorio estará no “limiar do radio de acción dunha borrasca moi profunda localizada no Atlántico norte”, explica MeteoGalicia. O paso de varias borrascas e vaguadas cubrirán os ceos e descargarán precipitacións ao longo de toda a semana. Nalgúns puntos agárdanse nevadas dende este luns por enriba dos 1.200 metros. O chorro polar traerá frío e un río atmosférico que chega o xoves intensificará as chuvias. Co cal, agárdase unha ponte de decembro pasada por auga.
Os ceos deste luns estarán cubertos en toda a comunidade. As chuvias, intermitentes, irán remitindo ao longo da tarde. Durante a xornada entra aire frío, de maneira que os termómetros descenderán progresivamente. O martes predominará a estabilidade atmosférica en toda a comunidade. Será o único día no que non se agardan precipitacións. As altas presións despexarán os ceos, pero baixan as temperaturas mínimas. O tempo anticiclónico será moi breve, xa que o mércores volven os ceos cubertos e as chuvias, que serán máis intensas pola tarde. As temperaturas experimentarán un lixeiro ascenso.
Desta maneira, as previsións apuntan a que o xoves será unha xornada de chuvia e que a fin de semana haberá precipitacións, pero tamén intervalo secos. O río atmosférico impactará entre o xoves e o venres. “Arrincará practicamente dende o Caribe, polo que as precipitacións se reforzarán en boa parte do país. Serán localmente intensas e persistentes en Galicia, Sistema Central e cara sur do Pirineo”, apuntan dende Meteored. Os acumulados poderán pasar dos 200 l/m² na comunidade.
En conclusión, a primeira semana de decembro trae tempo moi cambiante para Galicia, cada día é distinto do anterior. As máximas non superarán os 14 graos e variarán dependendo da provincia. Neste senso, Vigo e Ourense son as cidades coas temperaturas máis altas e Lugo coas máis baixas. De momento, o litoral da Coruña e Pontevedra están en alerta amarela por grandes ondas e vento no mar, pero non se prevé que a inestabilidade tome cariz de temporal en terra.
