Explicación: esta faciana arrepiante, un perfil retorto que evoca o seu nome popular de nebulosa Cabeza de Meiga, brilla na escuridade pola luz estelar. De feito, este fascinante retrato telescópico dá a impresión de que a meiga olla de fite á estrela Rigel, unha brillante superxigante de Orión. Coñecida máis formalmente coma IC 2118, a Cabeza de Meiga abarca uns 50 anos luz e está composta de grans de po interestelar que reflicten a luz estelar de Rigel. A cor azul da nebulosa Cabeza de Meiga e do po que arrodea a Rigel está provocada non só pola intensa luz estelar azul de Rigel, tamén porque os grans de po difunden a luz azul de xeito máis eficiente có vermello. O mesmo proceso físico fai que o ceo terrestre pareza azul polo día, aínda que os difusores da atmosfera da Terra son moléculas de nitróxeno e osíxeno. Rigel, a nebulosa Cabeza de Meiga mailo gas e po que as arrodean atópanse a 800 anos luzde distancia.