Venres 29 Marzo 2024

Pont-Up Store: os emprendedores saen á rúa

Ducias de proxectos impulsados por emprendedores e emprendedoras de diferentes puntos de España formalizaron a súa inscrición no Pont-Up Store, o encontro de emprendemento impulsado pola Universidade de Vigo, que os días 25 e 26 de setembro encherá as rúas de Pontevedra de ideas innovadoras. A inscrición aínda se mantén aberta ata o 9 de setembro , aínda que o número de solicitudes xa desbordou as previsións, inicialmente fixadas en 32 stands na rúa.
Deseño, moda, complementos e decoración, comunicación, novas tecnoloxías xestión e servizos a empresas ou agricultura ecolóxica son algunhas das áreas temáticas nas que se enmarcan nos proxectos empresariais, presentados por candidatos e candidatas das catro provincias galegas e doutros puntos do Estado como Madrid ou Salamanca. De aí que Pedro Figueroa, profesor da Facultade de Ciencias Sociais e da Comunicación e director do grupo de investigación G4-Plus, impulsor do evento, faga énfase na “excelente resposta dos emprendedores” a esta iniciativa, así como na “gran variedade de propostas e a importante base tecnolóxica da maioría dos proxectos” presentados a unha convocatoria que conta co patrocinio principal do Concello de Pontevedra e o apoio do Consello Social da Universidade, Zona Franca, Abanca, Deputación de Pontevedra ou Igape.

As novas tecnoloxías están presentes entre as propostas de Pont-Up Store

Dirixido a dar visibilidade a novos proxectos empresariais, o Pont-Up Store acolle iniciativas con menos de 42 meses, tres anos e medio, de traxectoria, que deberán superar un proceso de selección no que un comité organizador valorará aspectos como o grao de innovación, a sustentabilidade e valor social ou a creatividade da proposta de actividades e de dinamización do evento. Ademais, darase prioridade a candidaturas que non participaran o pasado ano na primeira edición desta feira e buscarase a diversidade de participantes en canto a produtos, servizos ou sectores.
Os emprendedores seleccionados poderán escoller entre tres modalidades de participación neste evento. Por unha banda, poderán dispor de xeito gratuíto dun stand no que dar a coñecer os seus proxectos durante os dous días do encontro. Pero tamén poderán optar por participar no apartado 10 minutos de gloria, presentando a súa idea nun formato de “dez minutos, dez imaxes” ou propoñer actividades para a súa inclusión dentro do programa do evento.
O encontro contará ademais cunhas xornadas previas entre o 22 e o 24 de setembro, nas que se desenvolverá un extenso programa de charlas, mesas redondas, obradoiros ou demostracións e nas que unha serie de relatores compartirán as súas experiencias e coñecementos cos participantes.
Nacido en 2014 no seo da IV Conferencia Ibérica de Emprendemento, o Pont-Up Store busca facilitar aos novos emprendedores e emprendedoras un espazo no que visibilizar os seus proxectos, así como a promover a cultura do emprendemento con novos formatos e espazos de integración entre os novos emprendedores e a sociedade.

Publicidade

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Unha nova iniciativa de Clúster TIC impulsa o emprendemento tecnolóxico galego

As propostas seleccionadas contarán co respaldo de socios da entidade para optimizar os seus modelos de negocio

Galicia superará os 40 graos durante a cuarta onda de calor da península

O sur de Pontevedra a Ourense serán as zonas máis afectadas durante un episodio de calor intenso que durará ata o xoves

Unhas xornadas afondan en como creatividade e innovación xeran un futuro máis sostible

Celebraranse este mércores 24 na Casa das Campás, en Pontevedra, ao abeiro do programa "Ciencia de ida e volta" impulsado pola UVigo

O Servizo de Dixestivo do Hospital de Pontevedra, o mellor de España contra a hepatite C

Esta unidade é pioneira na utilización de técnicas de intelixencia artificial e big data para a detección de pacientes ou implementando o diagnósticos dos mesmos nun só paso