Un estudo de científicas dos Centros Oceanográficos de Vigo e A Coruña analizou a concentración de contaminantes orgánicos persistentes, como compostos clorados ou bromados, metais traza e metaloides (arsénico, cadmio, cobre, chumbo, mercurio, níquel ou zinc) nos ovos de dúas colonias de gaivotas patiamarelas (Larus michahellis) na área de Vigo. As mostraxes, realizadas na propia cidade e nas Illas Cíes, revelaron diferenzas significativas no caso do mercurio, entre outros indicadores, o que leva a pensar que estes valores “poderían estar a causar algúns efectos tóxicos na área da colonia de maior influencia antropoxénica”.
O traballo, asinado por Lucía Viñas, Vitoria Besada e Begoña Pérez-Fernández do Centro Oceanográfico de Vigo xunto a Antonio Bode, do Centro Oceanográfico da Coruña, será publicado en novembro na revista Environmental Research, e constata a validez da análise dos ovos de aves mariñas como “un excelente sistema de seguimento, sendo útil para estudar tanto a distribución espacial como a evolución temporal dos contaminantes no medio mariño”, segundo expoñen desde o IEO, xa que “a concentración de contaminantes nos ovos de aves mariñas reflicte a carga corporal en adultos”. Entre outros aspectos, sábese que as aves incorporan metais as súas plumas e, en particular, as aves femias poden acumular estes contaminantes a través da dieta e transferila aos ovos.
Neste sentido, a carga de organoclorados e mercurio nos ovos de aves mariñas mesmo foi recoñecida como un cualificador ambiental polas Comisións de Oslo e París, sendo a base para a formulación dalgúns dos Obxectivos de Calidad Ecolóxica (EcoQO) que proporcionan obxectivos operativos e indicadores para respaldar as avaliacións da saúde do ecosistema e axudar a dirixir as accións de xestión.
As dúas colonias están establecidas na Ría de Vigo, cunha distancia entre elas de tan só 10 km, unha na localidade de Vigo (cidade portuaria) e a outra nas Illas Cíes, dentro da demarcación do Parque Nacional, como área mariña protexida. A investigación apunta a unha dieta máis ampla da colonia de Cíes en comparación coa de Vigo. O estudo apoia, por tanto, o uso de ovos de gaivota patiamarela como bioindicador de contaminación capaz de diferenciar o nivel de contaminación mesmo en áreas xeográficamente próximas.
Referencia: Yellow-legged gull eggs (Larus michahellis) as persistent organic pollutants and trace metal bioindicator for two nearby areas with different human impact (Publicado en Environmental Research).