Xoves 28 Marzo 2024

Os meteorólogos alertan dun posible furacán no Atlántico que afectaría a Galicia en setembro

Os modelos estiman en 70% as probabilidades de que se forme o sistema nos próximos cinco días, podendo derivar nunha "profunda borrasca"

Agosto chega á súa fin e, con el, as vacacións e o verán. Setembro chama á porta para volver ao cole… E ao traballo. O mal tempo sempre axuda a retomar a rutina; a pensar que non estás a perder un bo día de praia. Esta fin de semana, de feito, está previsto que volvan as choivas a Galicia, pero iso non o é todo. Son varios os modelos meteorolóxicos que alertan da posible formación dun furacán no Atlántico norte que, segundo os expertos, sería un evento atmosférico “anormalmente alto en latitude”. Malia que aínda é unha predición, o Centro Nacional de Furacáns dos Estados Unidos xa estima nun 70% a probabilidade, a cinco días, de que se forme o sistema.

O investigador da Axencia Estatal de Meteoroloxía (AEMET) J.J. González Alemán explicaba hoxe en Twitter: “Aínda é un escenario por afianzar, pero é posible que a península ibérica teña que poñer o ollo na formación dun furacán. As traxectorias previstas polos modelos apuntan á nosa rexión”. Unhas horas despois, o experto aseguraba que a coincidencia de modelos está a ser “robusta” e que as probabilidades estimadas polo Centro Nacional de Furacáns dos Estados Unidos estaban a aumentar. “Parece que Azores podería ser das primeiras afectadas por este sistema”, engade González Alemán.

Publicidade

Cales serían as súas consecuencias?

De momento, os meteorólogos manteñen a prudencia e recordan que só se está a falar de probabilidades. Polo tanto, resulta moi complicado estimar cal podería ser o impacto que tería o potencial furacán sobre a península e, máis concretamente, sobre Galicia. Os detalles que están a trascender ata o momento tamén os ofrece a conta InfoMeteoTuit. Segundo explican na súa canle de Twitter, o posible furacán podería derivar nunha “profunda borrasca atlántica” xa a mediados de setembro que, de forma “moi probable”, serían os “restos” do sistema formado en días anteriores. No modelo que ofrecen pódese apreciar como entre o 14 e o 15 de setembro, esa fronte podería rozar Galicia.

https://twitter.com/InfoMeteoTuit/status/1564716757100666882

Para determinar cal sería o impacto deste furacán é preciso esperar. González Alemán asegura que “entran en xogo procesos moi complexos” e insiste en que “aínda non se formou”. Non obstante, o meteorólogo cre que se trata dun “escenario bastante serio e significativo” como para estar pendentes. Amais disto, o investigador da AEMET fai fincapé en que o foco de atención debería estar, sobre todo, nas “altas probabilidades” de que o furacán —de formarse— se achegué á península.

Por que se consideraría un evento “anómalo”?

Tal e como explica González Alemán, se se chegase a formar o sistema, trataríase dun evento atmosférico anómalo por estar situado “moi ao norte”. De feito, o investigador da AEMET indica o seguinte: “Este ano temos un alto potencial de formación de furacáns máis ao norte do normal”. E malia que xa existen algúns estudos que analizan este fenómeno, o meteorólogo cre que está expansión dos ciclóns tropicais cara ao norte, e a súa afectación de novas zonas, “é unha liña de investigación que aínda necesita responder bastantes cuestións complexas”.

Finalmente, González Alemán tamén fai mención á onda de calor mariña que está a sufrir o Atlántico norte. “As augas superficiais [desta zona] tamén están rexistrando récords de temperaturas (dende polo menos 1981). Isto é unha barbaridade”, analiza o meteorólogo. Amais disto, relaciona a onda de calor mariña coa posible formación do furacán nesa área. O investigador explica que estas temperaturas anómalas “non provocan directamente” o fenómeno, pero si que o “potencian”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Galicia vivirá unha primavera “máis cálida do normal”

Segundo a AEMET, as temperaturas invernais estiveron 1,8 graos por enriba da media habitual para esta época do ano

Unha masa de aire subtropical elevará os termómetros en Galicia ata os 21 graos. Canto vai durar?

A partir do xoves agárdase a entrada de novas borrascas atlánticas que deixarán precipitacións no oeste da comunidade

Francisco Infante, delegado da Aemet: “En Galicia está cambiando o patrón de precipitacións”

O experto apunta que a comunidade suma meses máis cálidos do normal e que non será unha excepción á subida do nivel do mar

Unha profunda borrasca atlántica azouta Galicia esta fin de semana con chuvia, vento e neve

O centro de baixas presións situado sobre Irlanda enviará unha fronte fría na madrugada do sábado