Xoves 28 Marzo 2024

Forenses da USC participan nun proxecto europeo para identificar criminais

Un grupo do Instituto de Ciencias Forenses Luis Concheiro da USC participa no proxecto europeo Visage, consorcio financiado con cinco millóns de euros que reúne institucións universitarios, grupos policiais e institucións de xustiza de oito países europeos co fin de deseñar técnicas que permitan determinar as características físicas, ancestrais e idade dun individuo a partir de restos do seu ADN. O grupo da USC coordinado por Ángel Carracedo, María Victoria Lareu e Chris Phillips lidera dentro deste consorcio a investigación no ámbito da ancestralidade. O seu obxectivo será o desenvolvemento de protocolos para a determinación da orixe xeográfica dun individuo, eido no que o grupo da USC xa fora pioneiro polo deseño e utilización de técnicas de análise nos atentados do 11-M. 

Visage, acrónimo de “Visible Attributes Through Genomics”, é un proxecto financiado polo programa H2020 que coordina Manfred Kayser da Universidade de Rotterdam. A finalidade desta liña de traballo é a definición de técnicas que permitan a identificación das características físicas dun individuo como a cor de ollos ou de cabelo, características faciais, idade ou procedencia xeográfica a partir de calquera mostra biolóxica que fóra identificada nunha escena dun crime.

Publicidade

“Cando nun delito non hai sospeitoso non son válidos os métodos tradicionais de análise de ADN, polo que describir as características visibles externas do individuo que o cometeu a través de mostras biolóxicas atopadas na escena do crime axudan á investigación policial”, aclara o coordinador Manfred Kayser. A misión do proxecto será “establecer novos coñecementos científicos, desenvolver prototipos de ferramentas para a análise de ADN e a interpretación estatística, validar e implementar estas ferramentas na práctica forense, investigar as dimensións éticas, sociais e normativas” e a súa posterior difusión.

Os investigadores da USC participaron este martes na Erasmus University Medical Center Rotterdam na xuntanza de lanzamento coa que o proxecto comezou o seu traballo. Ademais da USC participan universidades e institucións forenses e policiais de Polonia, Austria, Alemaña, Reino Unido, Francia, Países Baixos e Suecia.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Investigadoras galegas constatan que as mulleres autistas camuflan máis os seus síntomas

O enmascaramento provoca retrasos no diagnóstico e problemas de saúde mental derivados da presión social

Ángel Carracedo: “O Proxecto Xenoma Galicia é o máis ambicioso do mundo”

A iniciativa recompilará o ADN de 400.000 galegos para identificar variantes xenéticas de alto risco e para anticiparse ás enfermidades

Ángel Carracedo: “Divulgar na miña terra? Teño claro que en galego”

O xenetista fai un repaso da súa traxectoria como líder dun laboratorio que é referencia internacional en Ciencias Legais en Forenses

Identificadas 51 rexións xenómicas responsables da severidade da covid

O catedrático da USC Ángel Carracedo participa na actualización do mapa xenético do SARS-CoV-2, que engade 28 rexións ás detectadas en 2021