Únete á nosa canle de Whatsapp
Xa o adiantaban os rexistros de récord que se superaron durante varios días de febreiro en Galicia. E os primeiros balances meteorolóxicos do mes pasado refrendan a situación: o avance meteorolóxico da Axencia Estatal de Meteoroloxía (Aemet) para Galicia, feito público este luns, expón que foi un mes moi seco e moi cálido (o 2º máis cálido do século, só superado polo febreiro de 2008, nas estacións da Coruña, Pontevedra e os aeroportos de Santiago e Vigo), cunha temperatura de 1,5ºC por riba do normal.
Así, as xornadas nas que se acadaron temperaturas moi altas para esta época do ano, con máis de 25ºC, supuxeron máximos históricos en Ourense, Pontevedra ou o aeroporto de Alvedro, e chegaron a marcarse 26,1 ºC en Ribadavia e 26ºC en Monforte. Atendendo á rede de MeteoGalicia, os termómetros chegaron a marcar 27,9ºC e foron notables os datos de Remuíño-A Arnoia (27,5), Pontevedra-Campolongo (26,6), Areas (26,5) ou Lourenzá (26,3).
O mes de febreiro en Galicia foi moi seco, na maior parte do territorio non se alcanzou o 50% das choivas normais do mes, e moi cálido, cunha anomalía de temperaturas de +1.5 ºC, con valores máximos que supuxeron nalgúns casos efemérides do mes. pic.twitter.com/5igvcXYQV5
— AEMET_Galicia (@AEMET_Galicia) 4 de marzo de 2019
En canto ás precipitacións, gran parte de Galicia nin sequera chegou ao 50% das chuvias normais do mes (sobre todo no sur e na zona central). As chuvias concentráronse, sobre todo, nos 10 primeiros días e entre o 17 e o 19, e as cantidades máis importantes chegaron o día 1, coa borrasca Helena; destacan ese día os 42 litros acumulados en Cervantes e Beariz.
Tamén con Helena chegaron os refachos máis fortes de vento. Foron 136 Km/h rexistrados en Fisterra, 113 en Cabo Vilán, 94 na Coruña, 91 en Vilagarcía e 82 en Ribadeo e Pontevedra.
As temperaturas mínimas absolutas caeron ata os -5,2ºC en Xinzo de Limia, onde en xaneiro se deron durante varios días algúns dos valores máis baixos da Península.
