Únete á nosa canle de Whatsapp
As Regueifas de Ciencia afrontan unha nova edición o xoves 29 de novembro cun dos debates que máis tempo leva instalado nas sociedades occidentais: a eutanasia. Segundo explican os organizadores do encontro, “cada ano cobra máis forza a voz dos que reclaman unha lexislación clara e libre de prexuízos que regule e permita a eutanasia”. E cada vez tamén son máis os países que están regulando estas situacións.
Porén, o rexeitamento á eutanasia segue sendo amplo por diversas razóns e desde diversos puntos de vista, tanto relixiosos, como legais ou éticos. Para enriquecer este debate, as Regueifas de Ciencia traerán ata a Facultade de Comunicación da USC a catro expertos na materia, que enfrontarán as súas posturas en dous bandos.
Na súa páxina web, Regueifas de Ciencia ofrece documentación relacionada coas posturas de cada un dos poñentes para documentarse antes de asistir ao evento.
A favor da eutanasia:
– Margarita Boladeras Cucurella, Catedrática emérita de Filosofía Moral e Política Universidade de Barcelona
– Isabel Blanco Domínguez, Directiva Derecho a Morir Dignamente
En contra:
– Francisco Javier Barón Duarte, Unidade de Hospitalización Servizo de Oncoloxía Medica do Hospital Universitario de A Coruña.
– Jacinto Bátiz Cantera, Doctor en Medicina e Cirurxía. Medico de Familia.
A entrada ás Regueifas é gratuíta e libre ata completar aforo. Poderase seguir tamén por streaming, e posteriormente a charla quedará subida á páxina da iniciativa. É un proxecto da USC co financiamento da Fecyt.
