Únete á nosa canle de Whatsapp
As novas posibilidades que ofrecen as técnicas de selección e edición xenética, como o caso de CRISPR, abren un enorme campo de investigación científica, pero tamén un intrincado debate ético e moral polas súas posibles consecuencias. Sobre esta cuestión (“Debemos permitir a edición xenética de embrións humanos?) xirará a nova edición das Regueifas de Ciencia, que terá lugar o 14 de decembro na Facultade de Comunicación da USC. A actividade, de acceso libre e gratuíto, está financiada pola Fundación Española de Ciencia y Tecnología (Fecyt).
Os poñentes
Nesta ocasión falarán catro expertos internacionais no eido da bioloxía, a medicina e biotecnoloxía. Pola parte a favor da edición xenética en embrións estarán Anna Veiga, bióloga catalana experta no estudo de células nai e reprodución asistida, e Rita Vassena, directora científica da clínica Eugin, especializada en reprodución asistida. Enfronte estarán Lluís Montoliu, científico do Centro Nacional de Biotecnología do CSIC, e César Nombela, catedrático de Microbioloxía da Universidad Complutense de Madrid.
