Médicos de Atención Primaria piden ao Sergas que poña fin ao estudo do coronavirus

O estudo epidemiolóxico que a Xunta de Galicia planeou para coñecer a circulación do coronavirus SARS-CoV-2 no país atópase cun novo obstáculo despois das dúbidas dos últimos días. Este martes, a Asociación Galega de Medicina Familiar e Comunitaria (Agamfec), que agrupa tamén a profesionais da Atención Primaria, fixo público un comunicado no que solicita “a finalización do actual estudo de seroprevalencia” que ten previsto rematar esta semana a primeira das súas fases. A entidade considera que cos resultados obtidos, a carga de traballo que supón a enquisa (con probas a 100.000 persoas) e a mobilización de profesionais sanitarios e a poboación que se requiren para a mesma, “o estudo debe rematar”.

A entidade xa amosara o seu malestar nos primeiros de estudo pola falta de información á hora de proceder nesta iniciativa da Xunta, independente e paralela á enquisa de seroprevalencia que impulsa o Goberno español, que comezou a pasada semana a analizar a 6.120 persoas en Galicia. Así, a xunta directiva da Agamfec lembra que “os profesionais enterámonos das cuestións xerais do estudo polos medios de comunicación, e tan só nos días previos foi comunicado de xeito oficial como se ía desenvolver o traballo de campo”. Ademais, sosteñen que a día de hoxe “seguimos a descoñecer o deseño do mesmo: tipo de estudo, cálculo e precisión do tamaño da mostra, tipo de mostra, aspectos éticos, xestión de datos e análise dos mesmos, entre outros aspectos”, engaden.

Publicidade

“Un bo número de enfermeiras destinan a meirande parte da súa xornada a facer o estudo”, denuncian

Ademais, o comunicado explica que o desenvolvemento do estudo, iniciado o 23 de abril, hai menos de dúas semanas, está a xerar inconvenientes na práctica diaria dos profesionais. “A carga de traballo non é desprezable, xa que un bo número de enfermeiras destinan a meirande parte da súa xornada a facer o estudo, mentras o resto ten que se ocupar do seu labor e do das compañeiras ocupadas”. Ademais, segundo alertan, “a mobilización de profesionais e sobre todo de poboación sá non está exenta dun incremento nos riscos de transmisión”.

Falta de tests a casos sospeitosos

Aínda que en Galicia se agardaba unha baixa circulación do virus, tal e como avanzaron membros do comité de xestión da crise sanitaria, como o xefe de servizo de Microbioloxía do Chuvi, Benito Regueiro, a porcentaxe de positivos está a ser aínda máis baixa do que se cría. Uns resultados que Agamfec cualifica de “definitorios, ao situar os positivos no entorno do 1% dos estudados”. Ante isto, expón a nota, “cabe pensar que os datos non mudarán por máis que se incremente a toma de mostras”, xa que, apuntan, “os estudos acostuman a interromperse cando os resultados amosan unha tendencia indiscutible”.

Os profesionais de atención lamentan neste punto que se estean reservando 100.000 tests para esta enquisa mentres segue habendo dificultades para analizar a casos sospeitosos. “Mentres se empregan tests en abundancia para este estudo, en Atención Primaria seguimos sen dispoñer da posibilidade de solicitar e realizar tests diagnósticos a todos os casos sospeitosos de Covid-19, véndonos obrigados a confinar no seu domicilio, en ocasións por tempo prolongado, a doentes e aos seus contactos sen termos confirmación de se son ou non casos de Covid-19″, expoñen. Ante esta conxunción de factores, “só compre concluír, dentro dunha análise custo/beneficio e considerando os custos de oportunidade xerados, que o estudo debe rematar”. Piden ademais a análise dos datos obtidos e a publicación do resultado dos mesmos, e consideran que os tests que queden sen utilizar “deben pórse ao dispor dos Servizos de Atención Primaria para o seu emprego en base a criterios clínicos”.

Diante da inminente desescalada, a Agamfec expón que este proceso esixe “unha nova organización do sistema sanitario para afrontar a nova etapa da pandemia”, na que “a Atención Primaria debe xogar un papel fundamental e para o cal necesita todos os recursos disponibles e un claro impulso da súa capacidade resolutiva”. A peculiaridade do escenario galego, cunha “baixa inmunidade poboacional”, debuxa, ao seu xuízo “un escenario no que todo isto cobra máis valor”.