Venres 29 Marzo 2024

Un anticiclón no Atlántico despraza a Galicia o aire frío do interior de Europa

Viana do Bolo experimenta 6,4 graos baixo cero, a temperatura mínima máis baixa rexistrada no país durante a pasada noite

As fortes chuvias das últimas semanas, ocasionadas polas borrascas Gérard e Fien, deixan paso ás altas presións. Un anticiclón situado no Atlántico, entre as Azores e Galicia, traerá tempo estable na península de cara aos vindeiros días. Porén, o seu movemento cara ás illas Británicas e Escandinavia está a desprazar unha masa de aire frío do interior de Europa. Así, esta semana predominará outra habitual estampa invernal: temperaturas baixo cero que se traducen nun frío intenso en boa parte de Galicia. De feito, Viana do Bolo experimentou -6,4ºC durante esta noite, converténdose na mínima máis baixa de todo o país.

Segundo explica a Axencia Estatal de Meteoroloxía (AEMET), o anticiclón favorece un ambiente estable, que vén acompañado de ceos despexados e vento frouxo. Isto provoca que se produza un arrefriamento noctuno da superficie, que se transmite a capas baixas da atmosfera, producíndose xeadas e inversións térmicas. A isto hai que sumar que, pola posición do anticiclón, está a chegar aire moi frío do interior de Europa. Polo que ao propio proceso de arrefriamento “autóctono” hai que engadir que o aire que se sitúa sobre a península xa é frío en orixe.

Publicidade

A situación manterase estable ata este xoves, cando se agardan chuvias

As zonas do interior de Galicia experimentaron o frío máis intenso durante a pasada madrugada. Ademais de Viana do Bolo, os municipios de Baltar, Verín e Xinzo de Limia viron descender significativamente os mercurios, con -5,8, -5 e -4,7 respectivamente. De igual maneira, o termómetro tamén descendeu a 5,2 graos baixo cero en Sarria. De feito, Meteogalicia activa o aviso amarelo para este martes no sur de Ourense, entre as 00.00 horas e as 9.00 horas, por temperaturas mínimas inferiores a -4ºC.

Tal e como prognostica a AEMET, a situación prolongarase ata o mércores con lixeiros cambios. O ambiente será frío nas horas centrais do día, aínda que a sensación térmica non será tan desagrable como co temporal ocasionado polas borrascas Gérard e Fien, dado que brillará o sol e os ventos soprarán frouxos. “Estamos ante os días máis fríos do inverno”, recolle a canle de Twitter da AEMET. A situación tamén se manterá estable en Galicia ata o xoves, cando se agardan chuvias puntuais. O venres xa se recuperará a estabilidade, que segundo os prognósticos actuais se manterá de cara á fin de semana.

É a primeira onda de frío do inverno?

De momentos, os servizos de meteoroloxía descartan denominar esta situación como “onda de frío”. “Teriamos que ter temperaturas mínimas entre o 5% das máis baixas rexistradas en xaneiro e febreiro entre 1971-2000 no 10% do territorio durante alomenos tres días consecutivos”, explican dende a AEMET. Seguindo eses criterios, e atendendo á predición actual de cara aos vindeiros días, non semella que a situación ocasionada polo anticiclón do Atlántico vaia derivar nunha onda de frío. No que caso de que así ocorra, non semella que esta primeira vaga do inverno, e do ano, vaia ser unha situación anómala, nin especialmente intensa ou extensa.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A borrasca Nelson activa a alerta en Galicia por chuvias, vento e temporal marítimo

A Semana Santa comeza con aviso laranxa por ondas de 7 metros en todo o litoral e amarelo por acumulación de chuvia de ata 40l/m2 en tan só 12 horas

Un río atmosférico empapa Semana Santa: Galicia poderá superar os 100 l/m² 

A situación de inestabilidade continuará durante a fin de semana, cando podería producirse unha cicloxénese explosiva no oeste da península

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra