O abandono gradual da gandería reduciría drasticamente a emisión de gases contaminantes

Os gases de efecto invernadoiro que emite a gandería contribúen ao quecemento global, por iso, un equipo científico da Universidade de Stanford e da Universidade de California en Berkeley, ambas en Estados Unidos, fíxose a seguinte pregunta: Cal sería o impacto da eliminación global desta práctica agrícola? A resposta publícase agora na revista PLoS Climate, onde revelan que o abandono gradual da gandería, combinado cun cambio de dieta baseada en plantas, detería durante 30 anos o aumento dos gases de efecto invernadoiro na atmosfera.

Se a agricultura animal se eliminase gradualmente en 15 anos e todas as demais emisións de gases de efecto invernadoiro continuasen como agora, “a eliminación crearía unha pausa de 30 anos nas emisións netas de gases de efecto invernadoiro e compensaría case o 70 % do efecto de quecemento desas emisións ata o final do século”, sinala Patrick Brown, profesor emérito do departamento de bioquímica da Universidade de Stanford, en declaracións recollidas pola Agencia SINC.

Publicidade

Abandono da gandería

Segundo o modelo analizado polo equipo científico, o abandono da gandería permitiría reducir o 68% das emisións de dióxido de carbono ata o ano 2100. Isto suporía o 52% da redución neta de emisións necesaria para limitar o quecemento global a 2ºC. O estudo revela que o 90% das reducións de emisións podería lograrse só coa substitución de ruminantes como o gando vacún e o ovino.

O estudo revela que o 90% das reducións de emisións podería lograrse só coa substitución de ruminantes como o gando vacún e o ovino

Os resultados do traballo mostran que estes cambios derivaríanse da descomposición espontánea do metano e o óxido nitroso, e da recuperación da biomasa nos ecosistemas naturais no máis do 80% da pegada terrestre da humanidade que actualmente se dedica á gandería.

“A redución ou eliminación da agricultura animal debería estar no máis alto da lista de posibles solucións climáticas”, apunta Brown. O investigador espera que dende outras áreas como a empresarial ou a política, se recoñeza que esa é a mellor oportunidade —e a máis inmediatad— e inverter a traxectoria do cambio climático, e oxalá “se aproveite a oportunidade”.

Oportunidade para a loita climática

A investigación suxire que este cambio suporía unha oportunidade climática coa diminución das emisións mediante a eliminación da gandería. “O efecto combinado é asombrosamente grande e, o que é igual de importante, rápido, xa que a maior parte dos beneficios obteríanse antes de 2050”, afirma o investigador estadounidense.

“A medida que diminúan as emisións de metano e óxido nitroso procedentes da gandería, os niveis atmosféricos destes potentes gases de efecto invernadoiro descenderán drasticamente nunhas décadas”, afirma Brown. Ademais, engade que o CO2 que se liberou á atmosfera cando os bosques e as praderías silvestres se substituíron por cultivos forraxeiros e terras de pastoreo poden volver converterse en biomasa a medida que se vaia eliminando o gando e se recuperen os bosques e as praderías.

Desenvolvemento do estudo

Xunto ao científico traballou Michael Eisen, profesor de xenética e desenvolvemento da UC Berkeley. Os científicos utilizaron os datos dispoñibles publicamente sobre a produción gandeira, as emisións relacionadas co gando e o potencial de recuperación da biomasa nas terras que actualmente se utilizan para a gandería, para predicir como a eliminación progresiva de toda ou parte da produción agrícola animal mundial alteraría as emisións antropoxénicas netas, ou causadas polo ser humano, a partir dos niveis de 2019.

Estableceron catro escenarios hipotéticos sobre a dieta e partiron da base de que as emisións non agrícolas se manterían constantes

A continuación, utilizaron un modelo climático sinxelo para proxectar como afectarían estes cambios á evolución dos niveis de gases de efecto invernadoiro na atmosfera e ao quecemento durante o resto do século. Para iso, examinaron catro escenarios sobre a dieta: unha substitución inmediata de toda a agricultura animal por unha dieta exclusivamente vexetal; unha transición máis gradual e, segundo os autores, máis realista, de 15 anos a unha dieta global exclusivamente vexetal; e versións de cada un nas que só se substituía a carne de vacún por produtos vexetais.

Para cada escenario hipotético, os científicos partiron da base de que as emisións non agrícolas se manterían constantes e de que a terra que antes se utilizaba para a produción gandeira se convertería en pasteiros, praderías, bosques e similares que absorberían o CO2 atmosférico.

Transición global a unha alimentación vexetal

Aínda que o traballo non afonda nos detalles da eliminación global da gandería, os seus autores recoñecen que os impactos económicos e sociais dunha transición global a unha dieta baseada en plantas serían crítica en moitas rexións e lugares. “É probable que se requira un investimento substancial para asegurar que as persoas que actualmente viven da agricultura animal non sufran cando esta se reduza”, expón Brown.

Os científicos puxeron ao dispor do público todos os datos brutos que utilizaron, así como os seus cálculos e o código informático empregado para realizalos, para que cada persoa poida formarse a súa propia opinión. Os científicos asumen que as actitudes fronte á comida son moi variables. “Hai 500 anos, ninguén en Italia vira nunca un tomate ou hai 70, ninguén en China bebera nunca soda”, exemplifica Eisen. Ao que Brown engade: “O bo da ciencia é que, ao final, todo se reduce a se as conclusións están apoiadas polas probas e neste caso, estano”.

Referencia: Rapid global phaseout of animal agriculture has the potential to stabilize greenhouse gas levels for 30 years and offset 68 percent of CO2 emissions this century (Publicado en PLoS Climate).