Únete á nosa canle de Whatsapp
Unha plataforma robótica subacuática de inspección non tripulada para o mantemento das estruturas offshore, un buque capaz de cargar cos muíños eólicos e instalalos a 40 metros de profundidade, e un sistema inmersivo para a asistencia remota ao mantemento de buques dende calquera lugar do mundo. Son os tres grandes proxectos de produción naval offshore que acometerá a Universidade da Coruña (UDC), que vén de presentalos publicamente.
Este gran programa, denominado A-Tempo —acrónimo de Avances en Tecnoloxías Mariñas, Produción Naval e Offshore—, desenvolverase cun orzamento de 3,2 millóns de euros que proceden, fundamentalmente, de fondos europeos a través do Ministerio de Economía, que aporta 2,5 millóns, e da propia universidade. A UDC colaborará coas tres firmas que resultaron adxudicatarias dos tres proxectos de investigación: Iberdrola, Ixion Industry & Aerospace e a UTE (Unión Temporal de Empresas) formada por Sistemas Audiovisuales Itelsis, SCIO SOFT e Neodyn. Entre todos avanzarán na investigación sobre tecnoloxía mariña, produción naval e offshore como mercados potenciais de futuro.
Os tres proxectos de A-Tempo orbitan en torno a unha plataforma de innovación offshore e responden a dous anos de busca da UDC sobre posibles mercados potenciais de negocio na enxeñaría do mar. Embarcará a preto de 150 persoas de distintos equipos e o obxectivo é ter os tres proxectos listos o 30 de setembro do próximo ano. Os investigadores da UDC comprometidos neste proxecto son do Grupo Integrado de Enxeñaría e do Laboratorio de Aplicacións Industriais do Láser e do Grupo de Polímeros do Centro de Investigacións Tecnolóxicas.
O programa conta cun orzamento de 3,2 millóns € que proceden de fondos europeos a través do Ministerio de Economía e da propia universidade
O primeiro é o deseño dun buque capaz de cargar cos muíños eólicos e instalalos a 40 metros de profundidade, ofrecendo unha solución integral a unha montaxe que é moi complexa e que require de vaias embarcacións. Neste participa Iberdrola, coa colaboración de Navantia e Seaplace, e ten un orzamento de 600.000 euros.
O segundo proxecto consiste nunha plataforma robótica subacuática de inspección para o mantemento das estruturas offshore, é dicir, instalacións que se atopan somerxidas no mar ou na súa superficie, como plataformas petrolíferas ou de extracción de gas, ou oleoductos submarinos. A inspección e o mantemento destas estruturas fanna mergulladores profesionais, non hai robots que realicen esa función completamente, polo que se plantexa o desenvolvemento dunha plataforma robótica que alcance calquera punto da estruturas offshore. O proxecto será acometido con Ixion Industry&Aerospace, cun orzamento de 500.000 euros e co respaldo de AlbatrosT e o Centro do Mar de Vigo.
O terceiro proxecto desenvolverá o deseño dun sistema inmersivo para a asistencia remota ao mantemento de buques dende calquera lugar do mundo, co fin de detectar, afianzar a seguridade na navegación e prolongar a súa vida útil. Acométese a través da UTE -SistemasAudiovisuais Itelsis, SCIO SOFT e Neodyn(Narón), cun orzamento de 410.000 euros.
O principal obxectivo do convenio A-Tempo é impulsar a competitividade do sector naval a través do fomento da innovación empresarial e, en especial, no ámbito das instalacións offshore e as novas xeracións de buques e outros elementos auxiliares con alto contido tecnolóxico que estas requiren, tanto na súa fabricación e posta en marcha como na súa operación e mantemento.
