A biotecnoloxía segue forte en Galicia. En 2013, a comunidade incrementou nun 31% o seu investimento interno en I+D biotecnolóxico, segundo os datos da estatística sobre uso de biotecnoloxía feitos públicos polo INE. Fronte a unha baixada estatal do 1,8%, Galicia aumentou en preto de 15 millóns de euros este gasto, ata situarse como a sexta que máis destina a este eido.
Por sectores, as empresas galegas destinaron un 17,6% máis que no 2012 á I+D en biotecnoloxía, mentres que administracións públicas, ensino superior e institucións privadas sen fins de lucro o fixeron nun 39%. Ademais, cómpre sinalar que o persoal empregado en I+D interna en biotecnoloxía se incrementou nun 26%, ata chegar a preto de 1.270 persoas. O número de investigadores aumentou un 39%, ata sumar preto de 830.
Ata 2020 van mobilizarse 1.600 millóns en Galicia para proxectos innovadores
A biotecnoloxía xa supón o 1% do PIB da Galicia. A Consellería de Economía e Industria destacou onte estes datos, “e a potencialidade do sector coa nova Estratexia de Especialización Intelixente – RIS3, que mobilizará 1.600 millóns de euros en Galicia ata o 2020 en proxectos innovadores”.
A través dos fondos da RIS3, a Xunta pretende potenciar a biotecnoloxía como ferramenta de apoio ao desenvolvemento de produtos e servizos que produzan alimentos de alto valor engadido. Ademais, aplicarase a biotecnoloxía á cadea monte-industria, desenvolvendo produtos biotecnolóxicos para a medicina e a cosmética; e crearanse novos materiais de orixe mariño aproveitando os residuos pesqueiros.