Venres 29 Marzo 2024

Galchimia, química orgánica con acento galego

A traxectoria de Galchimia é a demostración palpábel de que o soño dos emprendedores se pode facer realidade, iso si: con moito esforzo detrás e coas ideas moi claras para converter a aposta pola innovación e a internacionalización nun seguro fronte aos vaivéns do mercado. A empresa, que naceu fai máis de quince anos como idea de dous estudantes de Química Orgánica da Universidade de Santiago (USC), Carme Pampín e Jacobo Cruces, acabou consolidada despois do seu nacemento como spin-off.

Laboratorios de Galchimia.
Laboratorios de Galchimia.

Pampín, actual CEO de Galchimia, lembra que a empresa é un produto dunha das primeiras ideas desenvolvidas ao abeiro do programa pioneiro de emprendemento da USC. “O proxecto gustou na Universidade e aos poucos empezamos a facer un plan de negocio, coa innovación e a internacionalización como bandeiras desde un principio. Uninova axudounos a realizar o plan e, posteriormente, Unirisco achegou parte do financiamento”, explica Pampín, quen indica que a empresa se foi adaptando ás necesidades do mercado e rematou por adoptar un modelo de funcionamento que segue sendo a súa principal fonte de traballo ata hoxe. Consiste en realizar investigación baixo contrato (outsourcing) para a industria farmaceútica. “O noso modelo baséase en facer I+D para terceiros”, conclúe Pampín.

Publicidade

Hoxe en día Galchimia ostenta o liderado español no campo da Química Orgánica Sintética. Ademais de traballar actualmente e de realizar investigación para distintas compañías farmacéuticas e biotecnolóxicas de primeiro nivel, conta cun catálogo de máis  de 200 produtos que a propia compañía vende a través da súa páxina web. Nos últimos anos Latinoamérica pasou a ser nun mercado importante para a compañía, aínda que un 75% dos seus ingresos aínda depende da liña de investigación baixo contrato. Galchimia conta agora cun persoal de 30 traballadores e en 2015 a súa facturación alcanzou os 1,8 millóns de euros.

Galchimia conta con 30 empregados e factura 1,8 millóns de euros

A innovación segue a ser o sinal de identidade de Galchimia xa que os encargos dos clientes adoitan consistir na xeración de novas moléculas. Para ‘inventalas‘ é necesario realizar un complexo estudo previo e ver se é factible seguir a dar pasos para culminar o proceso. A empresa asentada no Pino, preto de Santiago, segue a buscar novas vías para diversificar o seu negocio e xerar licenzas de produtos propios. Ademais,  mantén proxectos de colaboración con outras empresas tanto do exterior como galegas dentro de programas de apoio á investigación como Horizonte 2020, Interconecta, Madame Curie e Conecta Peme.

Co paso dos anos Galchimia converteuse na marca de referencia do sector químico en Galicia. Pampín destaca que ao longo destes anos se foi consolidando na comunidade autónoma un ‘ecosistema interesante‘ de empresas dentro da rama das Ciencias da Vida que fai posible que Galchimia poida colaborar con outras empresas galegas no terreo da I+D. Nesta liña hai que  destacar especialmente o proxecto ONCOGALFARMA, desenvolvido xunto ás empresas AMSlab e Oncostellae, dentro do programa Conecta Peme, para investigar terapias complementarias no tratamento do cancro.

A compañía nada no seo da USC mantén desde o principio a súa aposta polos recursos humanos galegos e preto do 90% do seu persoal procede dalgunha das tres universidades galegas. E ten unha política de baixa rotación dos traballadores e pola súa vinculación co proxecto. A crise económica tamén afectou a Galchimia, especialmente pola súa dependencia da industria farmacéutica. Pampín sinala que a vocación internacional de Galchimia e a súa aposta por desenvolverse noutros sectores, como a agroquímica, foron dous dos factores que axudaron á empresa para superar a crise, que foi especialmente dura no ano 2013.

1 comentario

  1. Sería moi interesante que a selección de persoal en Galchimia fose valorando rigurosamente o curriculum, méritos e capacidade do persoal investigador que aplica à Galchimia. Grazas

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde

Identificado un novo campamento romano na fronteira entre Galicia e Portugal

Un equipo de arqueólogos detecta un posible recinto fortificado de tres hectáreas de extensión datado entre os séculos I a.C. e I d.C.