ViaGalicia, a aceleradora impulsada polo Consorcio da Zona Franca de Vigo e a Xunta de Galicia, comeza mañá a fase de aceleración dos 16 proxectos seleccionados na súa quinta edición. Durante un período de seis meses, e no espazo de coworking do Centro de Negocios Porto do Molle, un equipo de titores e mentores especializados en diferentes áreas empresariais (produto, finanzas, internacionalización, márketing…), traballarán intensamente cos emprendedores co obxectivo de avanzar na posta en marcha dun modelo de negocio definido, preparándose así para a súa presentación a posibles roldas de financiamento.
A comezos do mes de abril, o Comité Técnico de ViaGalicia seleccionou estas 16 propostas, dos máis de 200 presentados a esta última edición, tras analizar entre outros elementos a súa capacidade de retorno do investimento ou a súa relevancia estratéxica dentro do tecido empresarial galego. As novas empresas que agora comezan esta nova fase pertencen ao sector TIC, a agroalimentación, a música, a artesanía ou a automoción, e ademais do proceso de aceleración en si mesmo, poderán dispoñer de ata un máximo de 125.000 euros en axudas directas e de capital risco.
ViaGalicia é unha aceleradora impulsada polo Consorcio da Zona Franca de Vigo e a Xunta de Galicia, cuxo obxectivo é apostar por proxectos innovadores, acelerables e invertibles a través da súa participación nun amplo programa de formación, mentoring, coworking e financiamento. Desde a súa posta en marcha en 2013 e ata a súa quinta edición, recibiu máis de 1.000 propostas de negocio e investido 6,5 millóns de euros no impulso de máis de 160 proxectos, dos que máis de 68 convertéronse en empresas que crearon máis de 360 novos empregos.