Venres 29 Marzo 2024

O coronavirus en España, ao detalle: o 87% dos falecidos, maior de 70 anos

O Ministerio de Sanidad publicou por primeira vez este domingo os datos de case 20.000 casos por grupo de idade e situación clínica

Por primeira vez desde o comezo da crise, o Ministerio de Sanidad español difundiu este domingo na súa páxina web os datos por grupos de idade da maior parte das persoas con positivo confirmado polo coronavirus SARS-CoV-2. A información expón, segundo aclara o Goberno, preto de 19.000 casos nos que se dispoñía da información suficiente (son 28.572 en total, segundo a última actualización) para esta análise. E confirma unha das advertencias que se viñan facendo sobre a vulnerabilidade das persoas maiores: dos 805 falecidos compilados segundo estas estatísticas, 705 deles (o 87,57%) corresponden a persoas de máis de 70 anos.

A táboa que difunde Sanidad (e que podes ver debullada segundo os distintos indicadores baixo estás liñas) analiza tamén o total de casos confirmados, e as cifras e porcentaxes de persoas hospitalizadas, ingresadas nas UCI e os falecidos, así como a taxa de letalidade en cada un dos grupos de idade. Nestes últimos puntos obsérvase, por exemplo, que a letalidade da Covid-19 en maiores de 80 anos é do 17,91%, mentres que nos menores de 60 anos non pasa do 0,64%.

Publicidade

Así, a taxa de letalidade de España é, cos datos actualizados o domingo, do 6%, fronte ao 9% de Italia, o 7,2% de Irán, o 4% de China, o 3,9% de Francia, o 1,3% de Estados Unidos, o 1,2% de Corea do Sur 0,3% de Alemaña. Con todo, estes datos precisan de máis contexto para a súa interpretación, xa que as políticas de xestión da crise e control e seguimento de casos en cada país foron distintas.

Outros países, como Italia ou Portugal, xa levan tempo informando dos casos en función da idade, e mesmo os síntomas de cada un dos casos sobre os que se recolleu a información precisa. A Direção-Geral de Saúde de Portugal ofrece todos os días diversos indicadores, como os síntomas dos casos confirmados, grupo de idade, xénero e tipo de contaxio (comunitario ou importado).

Ata o de agora, a Consellería de Sanidade non ofrece estes datos para Galicia, que si achegan outras comunidades autónomas como Canarias e Euskadi, entre outras. O que si trascendeu en Galicia ata agora foron as idades das persoas falecidas: o 88,88% (16 dos 18 óbitos) tiñan 70 ou máis anos. As outras dúas persoas, de 45 e 68 anos, tiñan doenzas que complicaron a evolución da Covid-19. Sete son mulleres e 11, homes.

O 88,8% das persoas falecidas en Galicia tiña 70 ou máis anos

Informe do Centro Nacional de Epidemioloxía

A través do web do Ministerio de Sanidad comezou tamén a difundirse o informe que o Centro Nacional de Epidemioloxía do Instituto de Salud Carlos III vén elaborando desde o comezo da crise. Con todo, segundo se salienta no propio documento, o informe recolle información detallada dunha pequena parte dos casos. Así, no número publicado o venres, só se analizan 3.657 dos 19.980 positivos confirmados ata ese momento en España (un 18,3%). Só 14 deles corresponden a Galicia, que naquel momento tiña 574 confirmados. Un dos datos salientables do informe epidemiolóxico é a elevada porcentaxe de contaxios no persoal sanitario, que segundo apuntou na comparecencia deste domingo o director do Centro de Coordinación de Alertas e Emerxencias Sanitarias, Fernando Simón, é do 12% de todos os casos. En Galicia son varios os colectivos de profesionais sanitarios e de atención a maiores e persoas con discapacidade os que nos últimos días veñen reclamando maior protección e mellor xestión para evitar a propagación da doenza a través deles, tendo en conta o seu contacto con grupos de persoas vulnerables.

Ademais, o informe expón que os síntomas máis frecuentes en España son febre, tose, disnea e calafríos. Un 37% das persoas contabilizadas nesta análise requiriron de hospitalización, un 29% desenvolveu pneumonía e un 9% tivo que ser ingresado na UCI (sempre segundo os casos analizados no informe). Ademais, o documento apunta que a porcentaxe de casos importados caeu do 51% do 3 de marzo ao 9% deste venres 20, o que evidencia a transmisión comunitaria nas últimas tres semanas en España.


Máis información:

Galicia achégase aos 1.000 casos, pero xa se deron 16 altas por coronavirus

 

2 COMENTÁRIOS

  1. Hay casi igual número de afectados de 70-79 que de >80, pero la mortalidad se ceba con los últimos. Claro que por las cifras parece que a los mayores ya no los llevan a la UCI.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Por que algúns pacientes teñen covid persistente e outros non? Este estudo dá na clave

Un equipo do Hospital Universitario de Zúrich busca mellorar a atención aos doentes con novas estratexias de tratamento

Ascenden a 57 os falecidos por gripe en Galicia

O último informe do Sergas confirma a tendencia á baixa da incidencia nas catro provincias

Por que aumentan as infeccións respiratorias agudas en España?

Estamos xusto no momento do incremento da curva da gripe que este ano coincidiu co Nadal e o aumento dos contactos sociais

Tes gripe ou covid? Estas son as diferenzas

A inmunóloga África González admite que teñen síntomas moi similares pero que se distinguen polo tempo de incubación e a estacionalidade