Venres 29 Marzo 2024

Insecticidas na placenta e no leite materno poderían ter relación co autismo

Un equipo do Centro de Investigacións Agro-Ambientais e Alimentarias da Universidade de Vigo está a desenvolver un estudo para analizar a presenza dalgúns contaminantes, como os retardantes de chama presentes nas tapicerías e cortinas ou os insecticidas de uso doméstico e mascotas, na placenta e no leite materno. Existe unha preocupación crecente, en base a datos epidemiolóxicos e clínicos, de que a exposición temperá a estes compostos, coñecidos como contaminantes orgánicos persistentes (COP) e pseudopersistentes, afecta ao sistema neurolóxico humano e pode conducir a deficiencias no seu desenvolvemento e problemas de aprendizaxe.

Tania Fernández, Jesús Simal e Elena Martínez, autores do estudo.
Tania Fernández, Jesús Simal e Elena Martínez, autores do estudo.

Para isto, o equipo, formado polo catedrático Jesús Simal, a profesora titular Elena Martínez Carballo e a investigadora predoutoral Tania Fernández, está a desenvolver un seguimento no embarazo e nos dous primeiros anos de vida do bebé para detectar a presenza destes contaminantes en nai e fillo e a posible transferencia dun a outro a través da placenta e do leite materno. Os niveis detectados relacionaranse coa incidencia do Trastorno de Espectro Autista (TEA).

Publicidade

Nas primeiras análises de placenta aparecen elementos como retardantes de chama e insecticidas de uso doméstico. Os resultados previos da análise das placentas reflicten a presenza de contaminantes estudados, como retardantes de chama, presentes nas tapicerías e cortinas, e de insecticidas de uso doméstico e de mascotas.

No traballo participan arredor dun cento de mulleres e os seus fillos, residentes nas catro provincias galegas. O estudo, iniciado no 2014 na Facultade de Ciencias do Campus de Ourense, atópase agora na fase de seguemento tras o parto. Os resultados, sinalan os investigadores, poderían estimular a que gobernos e institucións asuman medidas de control da contaminación ambiental e alimentaria co fin de diminuír os riscos para a saúde da poboación xeral.

Os resultados poderían forzar ás institucións a tomar medidas de control

A exposición aos contaminantes químicos, sexa por hábitos alimentarios ou exposición ambiental, é un tema de crecente interese nas investigacións no eido da saúde, tal e como explican os investigadores ourensáns. Cando o organismo absorbe estes compostos, poden distribuírse ao resto do corpo a través do torrente sanguíneo. As etapas do embarazo e a lactancia son dous momentos de especial interese para os investigadores, debido á súa repercusión na saúde das crianzas.

Á hora de analizar a relación dos niveis destes contaminantes coa incidencia do Trastorno de Espectro Autista hai que ter en conta que se estima que a nivel mundial un de cada 150 nacidos sufre Trastorno do Espectro Autista e só 20 anos atrás a proporción era de un por cada 10.000 nacementos. Existen, comentan os promotores do proxecto, evidencias que suxiren que os factores medio ambientais teñen unha importante contribución ao retraso no desenvolvemento e ao autismo en nenos. “Hai estudos que avalan a hipótese de que algúns contaminantes presentan efectos neurolóxicos sobre o sistema nervioso central afectando ao desenvolvemento e ás capacidades cognitivas e de aprendizaxe dos nenos, especialmente durante os dous/tres primeiros anos de vida. De igual forma tamén se relacionan co Trastorno de Espectro Autista”, sinalan.

Un de cada 150 nacidos sufre TEA; hai 20 anos era un de cada 10.000

Neste contexto, o obxectivo principal do estudo que se está a levar a cabo no Centro de Investigacións Agro-Ambientais e Alimentarias é cuantificar a presenza de contaminantes químicos orgánicos en poboación galega materno-infantil especialmente exposta a estes contaminantes froito dos seus hábitos alimentarios ou por exposición ambiental, xa sexa laboral ou doméstica, co fin de avaliar o seu impacto na saúde neurolóxica deste grupo de poboación. Para facelo, o estudo parte da análise do nivel de contaminantes químicos orgánicos propios da nai e que poderían chegar ao feto a través do intercambio de substancias a través da placenta. Isto conséguese coa análise de mostras de cabelo da nai, para coñecer as súas taxas de contaminantes, e mostras de placenta o de meconio, para coñecer os niveis de contaminación que poderían chegar ao feto.

O seguinte paso do estudo é coñecer os niveis de contaminantes químicos orgánicos que chegan aos lactantes a través do leite materno ou froito da súa exposición a contaminantes ambientais. Para elo, a investigación inclúe a análise do leite materno e mostras de cabelo do lactante aos seis meses de idade. Compararanse dous grupos de nenos, un alimentado con lactancia materna e outro alimentado con leite artificial exclusivamente. Feitos estes pasos, o seguinte será controlar como evolucionan o perfil e o grao de contaminación por contaminantes químicos orgánicos nos nenos durante os dous primeiros anos de vida froito da herdanza recibida da nai, dos seus hábitos alimentarios e da contorna na que se desenvolven. Avaliarase o impacto dos niveis de contaminantes encontrados no estado físico, cognitivo, psicomotor e neurolóxico do neno aos 6, 12, 18 e 24 meses, facéndoselle un seguimento tamén pediátrico.

1 comentario

  1. menudo titular sensacionalista, a ver se dá moitas visitas retorcer así un estudio que non se fixo, patetico

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Interveñen con éxito un tumor nunha bebé que aínda estaba en período de xestación

Un equipo do Hospital La Fe de Valencia salva a vida da pequena, de 28 semanas, e da súa nai, nunha intervención pioneira en España

Investigadoras galegas constatan que as mulleres autistas camuflan máis os seus síntomas

O enmascaramento provoca retrasos no diagnóstico e problemas de saúde mental derivados da presión social

Os ’pellets’ xa invaden zonas mariñas protexidas de Galicia

Unha simulación realizada pola organización internacional Oceana predí que os plásticos están presentes en todo o litoral da comunidade

Un equipo galego utiliza materiais que respiran CO2 para refrixerar e quentar fogares

O grupo da UDC busca substituír os actuais compoñentes de calefacción, daniños para o medioambiente, por outros máis sostibles e eficientes