A loita contra os efectos da Covid-19 ten tantas frontes que a ciencia e a industria poden poñer en marcha alianzas insospeitadas para enfrontarse á pandemia. Dende a veterana empresa de iluminación SETGA, fincada desde hai 30 anos en Pontevedra, pronto viron a oportunidade de tratar de contribuír cos seus coñecementos técnicos a combater os efectos do coronavirus. Actualmente están en plena investigación do uso da luz ultravioleta para desinfectar EPIs, máscaras e outros obxectos que empregan os sanitarios na atención aos pacientes que contraen a enfermidade.
O proxecto STERIONICS é un dos oito que foron seleccionados pola Axencia Galega de Innovación (GAIN) da Xunta de Galicia entre as solucións innovadoras que expuxeron as empresas galegas para a loita contra esta pandemia. En total investiranse 750.000 euros para apoiar estas iniciativas. As propostas seleccionadas foron aquelas que obtiveron a mellor puntuación en aspectos como a viabilidade técnica e as súas posibilidades de acabar chegando ao mercado.
Vicente Alonso, enxeñeiro de SETGA que coordina o proxecto, explica que a idea de poñelo en marcha xurdiu ao pouco tempo de desatarse a pandemia coa intención de que a empresa puidese aplicar o seu ‘know-how’ en materia de iluminación técnica a un sector que ata o momento lles resultaba alleo como o sanitario. “Evolucionamos desde a iluminación tradicional á tecnoloxía LED e vimos a posibilidade que había de aplicar estes coñecementos á desinfección de equipos sanitarios”, sinala Alonso.
As investigacións, nas que colabora o grupo de investigación de Fotónica da Universidade de Santiago, consisten polo momento en analizar a utilización da luz ultravioleta de tipo C, que posúe capacidade biocida, para poder desinfectar obxectos que utilizan os sanitarios durante a súa atención a pacientes de Covid-19. Segundo explica Alonso, xa se empezaron a deseñar prototipos de cabinas nas que se poderían desinfectar estes obxectos aínda que queda camiño para investigar cal debe ser a cantidade de luz ultravioleta que hai que aplicar aos obxectos para desposuílos desa carga vírica.
A luz ultravioleta destrúe as cadeas de ARN do coronavirus
“A luz ultravioleta destrúe as cadeas de ARN do coronavirus e doutros virus polo que se podería utilizar para a desinfección de obxectos utilizados polos sanitarios para atender a pacientes con distintas patoloxías”, explica Alonso, quen tamén lembra que hai que ter moito coidado co manexo desta tecnoloxía porque a luz ultravioleta é canceríxena e, ademais pode ocasionar danos na retina, por exemplo. A previsión de SETGA é contar nuns tres meses cos primeiros prototipos operativos e en nove meses ter lista unha primeira serie industrial para o seu uso en hospitais e xeriátricos.
Unha das claves na investigación que se está a desenvolver é determinar cal é a dose necesaria para desactivar ao SARS-CoV-2 nos distintos elementos que reciban este tratamento. Por iso tamén se buscou a colaboración de laboratorios de microbioloxía neste proxecto. Trátase de sumar coñecementos de diversas áreas para lograr un resultado positivo e conseguir un avance que, sen dúbida, podería ser moi útil para facilitar que se poida reutilizar este tipo de equipamento sanitario.
Aínda que a tecnoloxía da luz ultravioleta non é barata, Alonso sinala que de chegar a alcanzar o éxito neste proxecto de investigación se poderá contar con equipos que permitirán rematar aforrando custos porque non haberá que adquirir unha cantidade tan grande de equipamento desbotable e tamén se poderán aforrar os custos de loxística que implica a adquisición de grandes volumes destes equipos, como veu ocorrendo nas últimas semanas.
A aplicación da I+D é a base deste proxecto, algo ao que SETGA está moi afeita xa que traballan permanentemente no desenvolvemento de proxectos de I+D en colaboración con outras empresas e institucións. Case a metade do persoal da empresa de Pontevedra (50 traballadores en total) está formada por profesionais con coñecementos de enxeñería e participan de diversas formas en proxectos de investigación. “A I+D está no noso ADN”, conclúe Alonso.