A empresa Hifas da Terra e a patronal do sector conserveiro Anfaco-Cecopesca colaboran no proxecto NutriGen 4.0, que aspira ao desenvolvemento dunha industria intelixente e respectuosa co medio ambiente que contribúa a converter a Galicia nun referente en alimentación saudable. O proxecto conta cun orzamento de dous millóns de euros, cofinanciados co Programa Operativo Feder-Galicia 2014-2020, e forma parte do programa “Fábrica Intelixente” convocado pola Axencia Galega de Innovación (Gain) da Xunta de Galicia.
Segundo explica o director de Innovación de Hifas da Terra, Arturo Rodríguez, o proxecto vai permitir optimizar procesos produtivos e obter novos nutracéuticos, unha liña de produtos na que xa leva traballando anos a empresa e que consiste en suplementos alimentarios a partir de fungos, que axudan a prever enfermidades ou mellorar o seu tratamento.
“NutriGen 4.0 aproveita os resultados dos proxectos de I+D previos de Hifas da Terra nos que descubrimos que perdiamos potencial nas cepas de determinados fungos, por non coñecer todos os detalles dos procesos produtivos. Este proxecto trata de mellorar a automatización do proceso de produción e este é un campo no que a experiencia de Anfaco é moi importante”, sinala Rodríguez.
O proxecto permitirá a produción de novos metabolitos secundarios de varias especies de fungos da colección coa que xa conta Hifas da Terra, aplicando sensórica de control e monitorización en tempo real, comunicación con software de control de almacén, xestión automatizada de ordes de produción e protocolos de análise de calidade automatizados.
Para o desenvolvemento das actividades previstas no proxecto empregáranse ferramentas 4.0 e se realizará un completo estudo sobre unha base teórica que abranguerá todo o proceso, empregando NIR e imaxe hiperespectral desde a entrada de materia prima e seguimento do produto. Tamén se usarán ferramentas de cálculo computacional, simulación matemática avanzada e Big Data para o estudo das cepas de fungos.
Ademais, realizarase un estudo da seguridade e eficacia dos prototipos xerados e analizarase o seu potencial de personalización en humanos en relación co seu perfil xénico. Este coñecemento servirá para seleccionar os procesos con maior interese industrial para a súa implantación definitiva ao término do proxecto, mellorar a especificidade dos protocolos propostos e a comercialización de novas fórmulas con proceso optimizados.
“Estamos no inicio dun proxecto co que comezamos a finais de 2020 e agardamos contar cun primeiro prototipo de produto nos últimos meses de 2021 e poder comercializalo en dous ou tres anos. Posteriormente, continuaremos co desenvolvemento doutros produtos”, apunta o director de I+D da empresa Hifas da Terra.
NutriGen 4.0 desenvolvérase nas instalacións coas que conta a empresa en Bora (Pontevedra), onde se levará a cabo o proxecto piloto en salas altamente tecnificadas para despois poder avanzar cara a un sistema produtivo validado.
Rodríguez explica que a I+D é un campo no que Hifas da Terra conta cunha longa experiencia e actualmente traballan en varios proxectos que xa están a obter resultados en colaboración con centros hospitalarios do Servizo Galego de Saúde como os de Ourense e Vigo.
O proxecto conta cun orzamento de dous millóns de euros e os primeiros produtos poderán comercializarse en dous ou tres anos
No departamento de I+D da empresa contan con perfís profesionais moi variados, desde técnicos de laboratorio a biólogos ou veterinarios e tamén médicos e farmacéuticos que colaboran nas investigacións. A empresa investiga o papel dos fungos na prevención e tratamento do cancro e das patoloxías neurodexenerativas, cardiovasculares e autoinmunes.
Hifas da Terra conta cun centro de biotecnoloxía centrado na investigación e a innovación cun alto grado de especialización no desenvolvemento de nutracéuticos a partir de fungos medicinais. Pola súa banda, Anfaco-Cecopesca é unha asociación empresarial privada que representa a preto de 250 empresas do sector mariño e alimentario. Dispón dun centro tecnolóxico desde o que presta servizos de alto valor engadido aos seus asociados.
