Únete á nosa canle de Whatsapp
Hai xa máis de 10 anos que comezou a aventura de Alén Space no corazón da Agrupación Estratéxica Aeroespacial da Universidade de Vigo. Naquel momento, a tecnoloxía comezaba a facer realidade o New Space, unha nova fronteira da exploración espacial: con pequenos satélites tamén era posible viaxar ao espazo. Desta maneira, reducíanse en gran medida os custos de poñer estes aparellos en órbita: xa non era só un luxo exclusivo das grandes axencias internacionais.
En Galicia, un equipo de enxeñeiros púxose en marcha para situarse en primeira liña desta gran xanela de oportunidades. O primeiro gran froito da aventura, tras moito traballo, chegou pronto: en 2012 lanzouse o Xatcobeo, o primeiro nanosatélite español.
Esta traxectoria acabou desembocando no lanzamento de Alén Space, unha spin-off da UVigo que ten por obxectivo comercializar os servizos e produtos desenvoltos nesta aventura que comezou en 2008. Desde hai anos, a empresa conta co pulo e o apoio do programa Ignicia da Xunta, a través da Axencia Galega de Innovación (Gain).
Os membros deste grupo, que traballaron e colaboraron con entidades de referencia internacional, como a Axencia Espacial Europea, a NASA, a ONU, o Instituto de Técnica Aeroespacial (INTA) e a Agência Espacial Brasileira compón a empresa. Son expertos con máis dunha década de experiencia no desenvolvemento destes cubesats, polo que son pioneiros en Europa e Latinoamérica.
100% de misións cumpridas
Ata agora, o éxito destas misións nas que tomou parte Alén Space foi total. Despois de Xatcobeo, chegaron o Humsat-D, o DustCube e o Serpens, que cumpriron os obxectivos marcados. E en apenas tres semanas, a empresa galega afrontará un novo desafío co lanzamento do Lume-1, un nanosatélite desenvolto dentro do proxecto europeo FireRs, que serve como ferramenta para a detección temperá de incendios forestais e para dar soporte aos labores de caracterización e extinción dos mesmos. O equipo de Alén Space foi o encargado de desenvolver e incorporar as cargas útiles necesarias, así como da xestión do lanzamento do satélite e a súa posterior operación.
O próximo 27 de decembro, o Lume-1 sairá do cosmódromo ruso de Vostochny rumbo ao espazo, a bordo dun foguete Soyuz. Despois dun longo proceso de construción, probas e ensaios, o nanosatélite, dunhas dimensións de 20x10x10 centímetros e un peso de 2,1 quilos, será posto en órbita a 490 quilómetros de altura.
Do borrador ao espazo, en 8 meses
Alén Space presta tamén servizos a empresas. “Cando falamos de negocios pioneiros, sabemos que cada segundo importa e que o tempo pode marcar a diferenza entre o éxito ou o fracaso”, sinalan os seus impulsores. Así, o equipo comprométese a levar o nanosatélite desde un borrador en papel ao espazo nun período de oito meses.
Desde o seu nacemento, a progresión da empresa foi meteórica. Este ano foi escollida como unha das 100 empresas máis innovadoras do mundo no South Summit celebrado en Madrid, entre máis de 3.000 proxectos de 84 países. E a comezos de decembro, recibiron o premio do público e a prensa nos galardóns Everis. Uns días antes, Alén foi a anfitrioa no encontro New Space celebrado en Vigo, onde se reuniron grandes empresas e institucións do sector aeroespacial.
Nos seus inicios, Alén Space recibiu o impulso de ViaGalicia, a aceleradora coordinada polo Consorcio Zona Franca de Vigo e a Axencia Galega de Innovación. Foi unha das 15 finalistas na edición de 2017.
