Únete á nosa canle de Whatsapp
O futuro xa está aquí. O CTAG puxo en marcha o Centro de Excelencia en Electrónica para Vehículos Intelixentes. Con estes novos equipamentos, Galicia aposta por situarse na vangarda europea da Intelixencia Artifical aplicada ao sector da automoción.
O novo centro permitirá ao CTAG aumentar as liñas de investigación en electrónica e sistemas intelixentes de transporte, e desenvolver novos proxectos, non só para o sector da automoción, senón tamén para outras industrias. No centro, ubicado en O Porriño, se desenvolverán prototipos, simuladores ou sistemas avanzados de seguridade e axuda á condución. As novas instalacións, nas que traballan 130 tecnólogos, contan con talleres, laboratorios, bancos de ensaios e equipos para a produción de novas tecnoloxías. Alí se desenvolverán actividades de I+D+i e de validación de sistemas e vehículos intelixentes.
O centro conta cunha área de probas capaz de reproducir de maneira flexible diferentes contornos de condución que permiten testar os automóbiles que integran sistemas intelixentes. Tamén foron habilitados espazos para o desenvolvemento de novas empresas de I+D+i de base tecnolóxica.
Exportar I+D+i
A nova división de vehículos intelixentes estréase tras dous anos de construción e 10 millóns de euros de investimento por parte da Xunta. O obxectivo agora é converter este centro “nun referente europeo”, expresou o presidente de Galicia, Alberto Núñez Feijóo, durante a súa visita a estas instalacións, na que estivo acompañado polo conselleiro de Economía e Industria, Francisco Conde, e a delegada do Estado no Consorcio Zona Franca de Vigo, Teresa Pedrosa.
Feijóo destacou que o Centro de Excelencia en Electrónica para Vehículos Intelixentes traballará para xerar “I+D+i exportable en forma de patentes ou acordos de comercialización que se traduzan en retornos económicos para Galicia”.
A automoción galega dá resposta así a un dos retos máis destacados da Estratexia da UE para 2020: o desenvolvemento dun transporte integrado e intelixente, con vehículos máis seguros e máis sustentables. Neste marco, a Estratexia de Especialización Intelixente de Galicia, a RIS 3, constitúe a folla de ruta da innovación galega ata o marcado ano 2020.
O Centro Tecnolóxico de Automoción de Galicia (CTAG) inaugurouse en 2002 para a investigación, desenvolvemento e innovación, para ofrecer solucións tecnolóxicas avanzadas ao sector do automóbil e contribuír á mellora da competitividade das empresas de automoción.
Ubicado no Polígono Industrial de A Granxa (O Porriño), o centro conta cos equipamentos más avanzados en materia de investigación e ten participado en proxectos internacionais como o ARTRAC (Advanced Radar Tracking and Classification for Enhanced Road Safety) —impulsado por Volkswagen e FIAT—, un sistema automático para evitar atropelos de peóns e ciclistas; o proxecto OpEneR para aumentar a autonomía de vehículos eléctricos e híbridos , en colaboración con PSA Peugeot Citroën e Bosch; o primeiro proxecto en España de automóbil conectado ao fogar, con Telefónica e Ericsson, ou o desenvolvemento con empresas portuguesas de coches de propulsión eléctrica.
