A Fundación TIC sumouse aos actos organizados polo Concello de Lugo con motivo do Día Internacional da Muller coa presentación dun documental sobre a vida e traxectoria das irmás Jimena e Elisa Fernández de la Vega Lombán, as primeiras mulleres que se licenciaron en Galicia. Este traballo elaborouse en colaboración co IES Lucus Augusti de Lugo, o instituto no que as irmás estudaron o bacharelato por libre.
O patrón da TIC, Álvaro Santos, subliñou que “é o primeiro documento audiovisual que existe sobre estas pioneiras, dúas mulleres excepcionais, loitadoras, apaixonadas e comprometidas, que abriron o camiño á muller na universidade e no campo científico”. Con este proxecto a TIC e o instituto lucense, a través dun convenio de colaboración entre ambas institucións, poñen en valor a figura e o labor destas mulleres cun documento co que “contribuímos á difusión de referentes da cultura e historia da nosa provincia que serven de exemplo entre as novas xeracións”, subliñou o deputado provincial.
Colaborou o IES Lucus Augusti, no que as irmás estudaron o bacharelato por libre
O documental, titulado 120 anos do nacemento das irmás Fenández de la Vega, cunha duración aproximada de 20 minutos, fai un percorrido pola vida e traxectoria das primeiras médicas galegas. O documento recolle relatos únicos de familiares e investigadores das Universidades de Santiago de Compostela e da Coruña.
Entre os relatores atópanse figuras como o catedrático da Universidade de Santiago de Compostela (USC), Ricardo Gurriarán, un dos primeiros que sacou á luz documentación sobre as pioneiras; a catedrática de xenética do Campus de Lugo da USC, Laura Sánchez Piñón; e Ánxela Bugallo, doutora en Bioloxía da Universidade da Coruña (UDC). O fío condutor e o acento máis íntimo do audiovisual ten como protagonista a Óscar Fernández de la Vega, un dos poucos parentes das xemelgas que quedan en Lugo.
Jimena e Elisa Fernández de la Vega Lombán, irmás xemelgas nacidas na localidade asturiana de Vegadeo, e que estiveron moi vinculadas as súas raíces en Lugo, ingresaron na Facultade de Medicina de Santiago de Compostela en 1913, tres anos despois da aprobación do Real Decreto do 8 de marzo que permitía o acceso da muller á universidade. Pese a ser discriminadas por ser mulleres, obtiveron os mellores expedientes da súa promoción e a ámbalas dúas foilles outorgada a Cruz de Alfonso XIII.
Con posterioridade, as irmás fixeron grandes achegas á ciencia en España e Europa, en especial Jimena, que traballou con prestixiosos da época como Gregorio Marañón ou Nóvoa Santos. A pesar dos seus logros, recibiron un recoñecemento tardío na historia, xa que non é ata o ano 1996, cando a Xunta de Galicia e a USC dedican ás irmás un «Vítor», o primeiro da institución galega ata o momento, referido a unha muller. Na actualidade dan nome ao Vicerreitorado de estudantes de Compostela e a unha rúa na súa vila natal.
Ola, grazas pola referencia feita ó documental, que colgamos na web do noso IES, quedando así á disposición de quen tivese interese:
https://bibliolucus.wordpress.com/2016/03/20/120-aniversario-das-irmas-fernandez-de-la-vega-o-documental/.