Unha nova achega á cerámica e metalurxia castrexas

A investigadora Cristina Seoane presenta na USC unha tese que aborda os estudos arqueolóxicos sobre este patrimonio cunha nova perspectiva

Ola castrexa decorada, exposta no museo arqueolóxico de San Antón, na Coruña. Fonte: coruna.gal.
Ola castrexa decorada, exposta no museo arqueolóxico de San Antón, na Coruña. Fonte: coruna.gal.

As producións cerámica e metalúrxica da Idade de Ferro no Noroeste peninsular sucedéronse paralelamente, de xeito que “cada produción que forma a cultura material dos castros non é resultado de procesos illados e, por tanto, todas son produto dun conxunto sociocultural específico, que evolucionan xuntas e que intercambian información entre elas”. Así se pronuncia a investigadora da USC Cristina Seoane Novo, que achega na súa tese de doutoramento unha nova perspectiva aos estudos de cerámica e metalurxia na cultura castrexa.

Cristina Seoane, autora da tese. Foto: USC.
Cristina Seoane, autora da tese. Foto: USC.

Fronte á estendida literatura arqueolóxica que sostén a posible orixe metálica de determinadas formas e decoracións do catálogo cerámico castrexo, a investigadora decidiu indagar na relación entre ambas manifestacións artísticas. Para iso estudou vasillas cerámicas e metálicas en conxunto, nun intento de comprobar a que niveis e en que termos se produce o diálogo entre artesanías.

En concreto, analizou en detalle dúas producións específicas, as sítulas con decoración xeométrica no caso dos metais e as vasillas perladas no das cerámicas, un traballo que derivou nun inventario exhaustivo que dotou dun marco teórico sólido, en base a estudos previos sobre esqueuomorfismo (fenómenos de imitación). A partir de aquí estudou en que dirección viaxa a información entre alfarería e metalurxia, que características se presentan e como inflúe nas dúas producións escollidas como estudo de caso.

Cristina Seoane Novo, investigadora do Grupo de Estudos para a Prehistoria do Noroeste Ibérico-Arqueoloxía, Antigüidade e Territorio (GEPN-AAT) da USC, acadou sobresaínte cum laude pola súa tese ‘Interaccións entre olería e metalurxia na Cultura Castrexa: sítulas de bronce e as súas analoxías cerámicas’.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.