Os vindeiros días 16 e 17 de xuño terá lugar no Centro de Negocios de Porto do Molle a décimo terceira Conferencia Internacional de Parques Científicos e Tecnolóxicos, evento que reunirá empresas e representantes de parques de toda España nunhas xornadas nas que destacados conferenciantes tratarán os conceptos de Organización 2.0, como ferramenta de innovación e competitividade.
Baixo o lema “Cara ao parque dixital. Transformacións que lideran” a conferencia reunirá a conferenciantes como Enrique Dans, Samuel Driessen (Entopic), Ana Neves (Knowman), Luís Suárez (Asesor en Novas Tecnoloxías) ou Joana Sánchez (Incipy), con empresas e outros axentes nun foro de difusión sobre os procesos de cambio cultural e métodos de xestión desenvolvidos nos parques tecnolóxicos.
Nesta edición viguesa os máis de 150 asistentes rexistrados debaterán sobre a implementación de estratexias online 2.0, tanto na xestión interna coma nas relacións cos clientes e mercados, así como a súa implementación nos parques científicos e tecnolóxicos, onde a aplicación da organización dixital pode mellorar aspectos tan importantes como a comunicación, a produtividade, a colaboración ou a aprendizaxe, ademais de actuar como elemento incentivador para a súa implantación nas empresas dos parques e os seus ámbitos.
Os premios APTE recoñecerán o mellor parque científico de España
Un total de 18 relatores intervirán nas principais sesións do evento que son: a transformación dixital dos parques científicos e tecnolóxicos, as organizacións que colaboran e a colaboración dixital para potenciar beneficios.
O día 16 ás 11 h 00 tamén terá lugar o acto de entrega dos Premios APTE á mellor práctica en parques científicos e tecnolóxicos, galardón que outorga a asociación para recoñecer as mellores novas prácticas levadas a cabo polas entidades xestoras dos parques no seu eido de actuación.
proveitando a celebración da Conferencia Internacional o luns, día 15, celebrarase a Asemblea Xeral da entidade, onde 50 representantes dos parques membros de APTE se darán cita en sesión pechada que se celebrará nas instalacións de Texvigo no Parque Tecnolóxico e Loxístico de Zona Franca, para tratar os principais temas que afectan aos parques científicos e tecnolóxicos españois. Nesta xornada do luns presentaranse os datos estatísticos anuais que elabora a Asociación e que reflicten a evolución dos parques en 2014 en materia de emprego, facturación, creación de empresas, investimento en I+D, entre outros.
A Asociación de Parques Científicos e Tecnolóxicos de España (APTE) é unha rede de redes que actualmente conta con 68 parques membros repartidos polo territorio español, e o seu principal obxectivo é potenciar o desenvolvemento destes espazos de innovación e contribuír á difusión das súas actividades, a mellora da innovación e a competitividade do tecido empresarial mediante a interrelación nos diferentes membros e outros axentes do sistema español de innovación.