Únete á nosa canle de Whatsapp
O uso de máscara para previr as infeccións do SARS-COV-2, causante da Covid-19, será obrigatorio en practicamente todas as situacións en Galicia. Así o anunciou no mediodía do venres o presidente da Xunta, despois do Consello do goberno autonómico. Galicia segue así a decisión tomada anteriormente pola maioría das comunidades autónomas, que xa avanzaran en días pasados un maior control neste sentido.
No caso galego, aínda que a normativa está pendente de coñecerse ao detalle, Alberto Núñez Feijoo avanzou que uso de máscara deberá facerse en todo caso, aínda podendo manter a distancia de seguridade. As excepcións que se contemplan son, entre outras, ás persoas con problemas respiratorios, as persoas conviventes, a práctica de deporte individual ou as praias, cando se estea parado/a ou na auga. Porén, neste último caso, Feijoo expuxo que será obrigatorio poñer a máscara ao camiñar pola area pola proximidade a outras persoas. Alén disto, a Xunta insiste en evitar as reunións masivas que poidan dar pé a un número importante de infeccións.
Focos en Betanzos e A Mariña
Os casos de Covid-19 detectados nos últimos días en Galicia, principalmente na localidade de Betanzos e na comarca da Mariña, centran os esforzos da Plataforma de Vixilancia Epidemiolóxica e os Servizos de Medicina Preventiva e Saúde Pública do Sergas. Os positivos vinculados a estes brotes nos últimos días achéganse á vintena: 10 deles na vila coruñesa e un número algo inferior na comarca lucense, onde se mantén o seguimento de contactos despois de detectar máis de 220 casos desde o 23 de xuño.
O foco de Betanzos é agora mesmo o que produce maior preocupación, xa que segundo informou La Voz de Galicia, Sanidade non descarta que se tomen novas medidas para conter o virus se non se conseguen trazar todos os vínculos entre os positivos.
Respecto á Mariña, Sanidade informou de dous novos positivos entre os resultados das 91 probas PCR realizadas nas últimas horas do xoves e primeiras do venres. Concedéronse, por outra banda, catro altas, o que sitúa o número de casos activos en 138. Concedéronse, segundo Sanidade, máis de 70 altas, o que situaría o número de infeccións detectadas ata arredor de 220. Porén poderían ser máis xa que, segundo recolleu Xornal da Mariña, que tivo acceso a un auto do Tribunal Superior de Xustiza de Galicia, a consellería sumaba hai máis dunha semana, o 9 de xullo, 224 casos relacionados co brote da comarca lucense.
En relación a este brote, 485 persoas seguen en seguimento, confinadas no domicilio, polo seu contacto con persoas infectadas. Son, neste caso, 39 menos có xoves, ao superar, nestes casos, o período de corentena indicado.
Outros puntos de Galicia, como Vilalba (con catro positivos), Beariz (catro), ou Vigo, con varios casos importados, están sendo tamén obxecto de especial vixilancia para evitar a propagación comunitaria do SARS-CoV-2.
Casos activos
A Dirección Xeral de Saúde Pública informou este venres da cifra de casos activos de infección polo SARS-CoV-2. Son 224, dos que 160 están na área de Lugo (138 na Mariña), 27 na Coruña, 17 en Vigo, 8 en Pontevedra, 7 en Santiago, 4 en Ourense e 1 en Ferrol. Hai unha persoa ingresada na UCI no hospital Álvaro Cunqueiro, e outras seis en unidades de hospitalización (cinco delas no hospital de Burela, en relación ao brote da Mariña). Galicia achégase xa aos 40 días sen falecementos por mor da Covid-19 (619 desde o comezo da pandemia), e 11.034 persoas xa superaron a infección.
Novas recomendacións en Catalunya e Aragón
O control do brote da Mariña e o levantamento das restricións na comarca, agás Burela, fai afastar, por agora, a posibilidade de medidas máis restritivas, que xa se están vendo noutras partes do territorio estatal. Así, o notable aumento de positivos detectados en Catalunya e Aragón, que fai patente a existencia de transmisión comunitaria, provocou que a Generalitat de Catalunya recomendase á cidadanía non saír da casa na área metropolitana de Barcelona. En Aragón, pola súa parte, o goberno autonómico anunciou que varias comarcas de Huesca e Zaragoza, entre as que se atopan as dúas capitais provinciais, pasan a unha “fase 2 flexibilizada” pola situación epidemiolóxica, na que se pide tamén limitar no posible a mobilidade.
