Xoves 28 Marzo 2024

Chega a borrasca Félix con ondas xigantes e ventos de 120 km/h

A predición das ondas que amosa a páxina de Puertos del Estado adianta a forza que traerá o temporal Félix, unha profunda borrasca que entrará en Galicia este sábado e que podería deixar ondas de máis de 10 metros, ademais de fortes rachas de vento e abundantes precipitacións. Ante esta situación, MeteoGalicia xa activou o aviso amarelo por vento no mar en toda a Costa, con vento sur de forza 7. Tamén hai aviso amarelo por ventos de ata 80 km/h na totalidade das provincias da Coruña e Pontevedra, norte de Lugo e montaña de Lugo e Ourense a partir desta tarde noite.

MeteoGalicia eleva a vermello o aviso sobre Félix

Con todo, a maior forza de Félix deixarase sentir o sábado e o domingo. Ao mediodía deste venres, MeteoGalicia elevou o nivel de aviso ata o vermello para a mañá do domingo entre Camariñas e Cabo Silleiro, por ondas que poderían superar os 8 metros no litoral. Ademais, toda Galicia estará con aviso por precipitacións, vento no mar ou refachos fortes de vento en terra.

Publicidade

Precipitacións: nivel amarelo no suroeste da provincia da Coruña, toda a provincia de Pontevedra e o sur da provincia de Ourense, desde a medianoite do sábado ata as 12 horas do domingo, por acumulados de chuvia de ata 40 litros por metro cadrado.

Refacho de vento: nivel laranxa nas provincias de Pontevedra e A Coruña e a montaña de Lugo e Ourense por refachos superiores a 100 km/h. No resto de Galicia, nivel amarelo por ventos de ata 80 km/h.

Vento no mar: nivel laranxa en toda a costa, desde cabo Silleiro ata Ribadeo, por vento de sudoeste forza 8.

Pola súa banda, a Agencia Estatal de Meteorología (Aemet) emitiu tamén un aviso debido á chegada de Félix. Adiantan que as ondas superarán os oito metros na costa, sobre todo na madrugada do sábado ao domingo e na mañá do domingo, con maior intensidade na costa de Pontevedra e o suroeste da Coruña. “O período de vento máis intenso – sinalan desde Aemet – comezará na tarde do sábado, con ventos que superarán os 120 km/h no litoral de Galicia na noite do sábado ao domingo e pasarán tamén dos 100 km/h en moitas outras zonas do país.

MeteoGalicia avisa xa dun nivel vermello na costa por ondas de máis de 8 metros. Fonte: meteogalicia.gal.
MeteoGalicia avisa xa dun nivel vermello na costa por ondas de máis de 8 metros. Fonte: meteogalicia.gal.

O aviso alerta tamén da intensidade das precipitacións, sobre todo nas Rías Baixas, onde a combinación das chuvias co mal estado da mar “podería dar lugar a inundacións locais“. Ante esta situación, a axencia estatal mantén o aviso en nivel laranxa por ondas e por fortes ventos en todo o territorio das provincias da Coruña e Pontevedra e no norte de Lugo. No resto de Galicia, sserá amarelo.

A borrasca Félix, como os anteriores temporais (Ana, Bruno, Carmen, David e Emma), leva nome propio a raíz  dun acordo entre MeteoFrance, Aemet e o IPMA (axencias meteorolóxicas de Francia, España e Portugal, respectivamente). Estas axencias decidiron bautizar as borrascas con ventos por riba de 90-100km/h, xa que a experiencia que levan a cabo desde 2015 Reino Unido e Irlanda “demostrou que a poboación permanece máis atenta ás recomendacións de seguridade cando a ameaza de vento forte está claramente identificada” con nome propio, segundo indicaba a Aemet nun comunicado.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A Serra da Capelada foi un glaciar da última Idade do Xeo: “É un caso singular en toda a península”

O traballo do catedrático e investigador da USC Augusto Pérez-Alberti analiza a súa configuración xeomorfolóxica e a paisaxe

As plantas non nativas aceleran a desaparición dos ameneiros galegos

As árbores centroeuropeas que se importan para restaurar as plantacións afectadas por unha doenza fúnxica producen uniformidade xenética

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

Primeira imaxe en luz polarizada do burato negro da Vía Láctea

Grazas a esta nova vista de Saxitario A*, a rede global de radiotelescopios EHT revela a existencia de fortes campos magnéticos xirando arredor do seu borde