Únete á nosa canle de Whatsapp
O 51% do alumnado da Universidade de Vigo son mulleres e os 49% homes, unha igualdade que non pode ocultar, con todo, a gran brecha de xénero existente nalgunhas carreiras. É o caso das enxeñerías, onde as alumnas son só o 25%, e se baixamos o foco a, por exemplo, Enxeñería Informática a súa presenza redúcese ao 13%. Son datos do curso 2019-20 achegados por Natalia Caparrini, vicerreitora de Captación de Alumnado da UVigo e que explican iniciativas educativas como o Bacharelato de excelencia en Ciencia e Tecnoloxía (STEMbach), pensado para fomentar o interese e as vocacións científicas e tecnolóxicas con perspectiva de xénero.
A brecha de xénero nos estudos STEM (Ciencias, Tecnoloxía, Enxeñería, Matemáticas) e o impacto da pandemia no STEMbach – dificultades asociadas ás restricións- foron os temas que centraron a segunda cita do foro de debate organizado polo Concello de Pontevedra, en colaboración con Gciencia, co gallo do Día da Muller e a Nena na Ciencia.
A mesa redonda STEMbach, en tempos do Covid-19 reuniu a Natalia Caparrini; Esther Padín Vidal, coordinadora do STEMbach do IES A Xunqueira II de Pontevedra; Ángela Soto Lamas, alumna de bacharelato STEM e Rosa Campos Briones, directora do Centro de Información á Muller (CIM) do Concello de Pontevedra.
O futuro e o presente están ligados á tecnoloxía e ao coñecemento e as mulleres non poden quedar á marxe. As mozas teñen que romper estereotipos (non hai estudos e profesións de homes e de mulleres), incorporarse ao ámbito STEM e, se é a súa elección, converterse en cientificas, enxeñeiras, investigadoras. A falta de referentes próximos, os prexuízos, as dúbidas das nenas sobre as súas propias capacidades, unha contorna que dirixe ás mozas cara aos coidados… explican, en boa medida, a situación. Pero como indicou Ángela Soto, animando ás nenas para abrazar a ciencia “que se guíen polos seus soños e non polo que crean os demais. Que tiren para adiante, porque todas somos capaces”.
