España rexistra xa 4.858 mortos por coronavirus, 769 máis que este xoves, e suma 64.059 contaxiados, dos que 4.165 están ingresados na UCI e 9.357 foron declarados curados. Así son os datos publicados este venres polo Ministerio de Sanidade, que amosan que a gráfica da epidemia segue a repuntar. O incremento porcentual do número de falecidos nas últimas 24 horas foi do 17,4 por cento.
Estados Unidos converteuse este xoves no país con máis contaxiados de coronavirus do mundo. Xa son máis de 85.000, segundo o reconto actualizado da Universidade Johns Hopkins, e supera a China, que conta con 81.782 positivos e que anunciou onte que pecha as súas fronteiras.
O secretario xeral de Nacións Unidas, António Guterres, pediu aos países do G20 un “plan de guerra coordinado” para frear a pandemia.
Italia, pola súa banda, rexistrou onte 662 mortos con coronavirus, 21 menos que o mércores, e a cifra total de falecidos elévase a 8.165, mentres que hai 80.539 positivos e 10.361 recuperados.
Irán, outro dos primeiros países afectados inicialmente pola pandemia, anunciou este venres 144 novas mortes relacionadas co coronavirus, elevando o número total a 2.378 falecidos no país.
O mapa do coronavirus en Galicia: casos en preto de 100 concellos
A pandemia do novo coronavirus orixinado na cidade de Wuhan, na provincia de Hubei, no centro de China, superou a cifra dos 530.000 contaxiados e causou a morte a máis de 24.000 persoas en todo o mundo, con Estados Unidos sumando nun só día 18.100 casos, o que supón o récord de contaxios superando a peor cifra rexistrada por China en febreiro, cando estaba na peor fase do abrocho.
Segundo o balance global actualizado este venres ás 8.00 pola Universidade Johns Hopkins, a pandemia do novo coronavirus estendeuse por 176 países e territorios, deixando un total de 533.416 persoas contaxiadas e 24.082 vítimas mortais.
O número de persoas que conseguiron curarse de Covid-19, a enfermidade xerada polo coronavirus, ascende a 122.710, a maioría delas en China (74.180). Os catro países máis afectados pola pandemia (Estados Unidos, China, Italia e España) suman máis de 306.000 casos, o que representa máis da metade do total de persoas contaxiadas co virus en todo o mundo.