A cifra de mortos diarios con coronavirus sobe en España: hai 325 novas vítimas mortais, un aumento respecto ao dato do martes, cando se rexistraron 301. Os curados nas últimas 24 horas son 6.399, a maior cifra desde o inicio da crise sanitaria. Xa son 24.275 os falecidos desde o inicio da emerxencia sanitaria, segundo os datos ofrecidos hoxe polo Ministerio de Sanidade.
A pandemia provocou máis de 217.000 decesos no mundo, onde xa hai máis de 3,1 millóns de infectados, segundo a Universidade Johns Hopkins.
Italia rexistra 201.505 casos totais de coronavirus, cun aumento de 2.091 nas últimas 24 horas, o que supón un lixeiro repunte respecto a onte, nunha xornada na que descenderon de novo os positivos actuais. O número de mortos alcanza os 27.359, cun aumento diario de 382. En total desde o inicio da emerxencia están curadas xa 68.941 persoas no país trasalpino.
O número de mortos por covid-19 rexistrados no Reino Unido disparouse tras coñecerse datos parciais sobre residencias de anciáns que suman polo menos 4.343 vítimas mortais á cifra de 21.678 falecidos en hospitais que actualiza cada día o Goberno británico.
Rusia confirma 5.841 novos casos de coronavirus nas últimas 24 horas, o que eleva o total a 99.399.
China rexistrou 22 novos casos da covid-19 nas últimas 24 horas, segundo datos oficiais. Só un respondeu a unha transmisión local, na provincia de Cantón, mentres que o resto foron importados. A estas cifras hai que sumar outros 26 casos asintomáticos. As cifras oficiais do virus elevan a 84.369 o número de casos totais ata a data, con 4.643 vítimas mortais (5,5%), 78.729 pacientes recuperados (93,3%) e 997 aínda activos (1,1%).
Arxentina confirma 124 novos casos de coronavirus, o que eleva a 4.127 as persoas contaxiadas en todo o país. Rexistráronse, ademais, 10 novas mortes. Os falecementos totais ascenden a 207.
Brasil viviu un novo récord de falecidos por coronavirus nun só día coas 474 mortes das últimas 24 horas. A cifra de vítimas mortais chega a 5.017 neste país.
O número de casos confirmados da covid-19 nos Estados Unidos superou este martes o millón, segundo o reconto da universidade John Hopkins. A cifra (1.008.066, na tarde do martes) supón case un terzo do total de casos confirmados en todo o mundo. Máis de 57.000 persoas faleceron no país coa enfermidade. Estados Unidos realizou 16,4 probas de diagnóstico por cada 100.000 habitantes, seis puntos por baixo de España, o segundo país con máis casos confirmados, e case sete puntos por baixo da media dos países da OCDE.
Aquí podes consultar os últimos datos do Ministerio de Sanidade