Desde o último tren de borrascas de decembro, con Daniel, Elsa e Fabien deixando un forte impacto en forma de grandes refachos de vento e precipitacións, a situación do tempo en Galicia estivo marcada pola presenza case constante do anticiclón, con breves momentos de precipitacións. Porén, esta semana a chuvia, o vento e as ondas recobrarán protagonismo, segundo advirten as predicións. Desde este mesmo luns, unha borrasca situada ao oeste de Irlanda deixarase notar, e outra nova fronte tomará o relevo cara aos seguintes días.
Bos días! Unha profunda borrasca ao oeste de Irlanda deixa hoxe en #Galicia ventos fortes no terzo norte.
Mañá, a formación dunha segunda borrasca traerá un temporal de vento con avisos de nivel laranxa: https://t.co/795Ol1Dc28 pic.twitter.com/fIwPYTZsoG— MeteoGalicia (@MeteoGalicia) January 13, 2020
A partir do mediodía do luns, activarase o aviso de nivel amarelo por vento no mar de forza 7. E en terra, entre Muros e Ribadeo,desde as 12 quedará establecido o nivel amarelo por ventos de máis de 80 km/h.
A situación empeorará o martes, xa que todo o litoral galego verá como o nivel de aviso subirá a laranxa por vento no mar de forza 8 e ondas de máis de cinco metros. E en terra, entre Laxe e Ribadeo tamén quedará decretado o nivel laranxa, xa que os refachos máis fortes superarán os 100 km/h. E a maior parte do resto de Galicia quedará con aviso amarelo tamén por vento. As precipitacións por chuvia non serán moi destacadas, pero haberá precipitacións xeneralizadas sobre todo na noite do martes ao mércores.
Por agora, ningún organismo estatal de meteoroloxía bautizou a borrasca. Pero de confirmarse a intensidade do temporal, recibiría o nome de Gloria. Terminan así varias semanas de predominio do tempo seco e soleado, mesmo con fortes xeadas no interior, onde se chegaron a acadar preto dos -10ºC en lugares como Calvos de Randín.