Así será o Nadal: ceas dun máximo de 6 persoas e toque de queda

O Goberno ultima as medidas para o Nadal ante a pandemia da Covid-19, que permitirán celebrar ceas familiares, aínda que con importantes restricións, segundo o borrador do decreto que presentará mañá mércores.

Era obvio que este Nadal non sería como o doutros anos, como veñen avisando dirixentes políticos e expertos sanitarios. E o plan do Goberno propón limitar as reunións de non conviventes a seis persoas como máximo, aconsella non celebrar Cabalgatas de Reis (agás as que sexan estáticas), e a única restrición que se relaxaría é o toque de queda ata a 1:00 horas os días 24 e 31 de decembro.

Publicidade

No borrador do plan sanitario para o Nadal fronte á Covid-19, que foi feito público na mañá do martes por RTVE, e que se levará este mércores ao Consello Interterritorial do Sistema Nacional de Saúde (SNS), mantense o confinamento nocturno durante todo o período do Nadal, coa excepción para Noiteboa e Noitevella, días nos que a restrición á mobilidade nocturna estará fixada entre a 1:00 e as 6:00 horas.

Con todo, as reunións familiares seguirán limitadas a seis persoas non conviventes como máximo. Malia esta disposición, Sanidade segue a recomendar no posible limitar a participación aos membros do grupo de convivencia estable, pois lembra que é “no ámbito social, sobre todo en reunións de familiares e amigos non conviventes”, onde máis gromos de contaxios se produciron.

En canto ás reunións de non conviventes, o borrador recomenda evitar os encontros sociais e de se celebrar, que sexan “preferiblemente no exterior”, ao tempo que insiste en que se garantan o que chamaron as “6 M“, isto é, as medidas de prevención habituais.

Así, recomenda usar máscara todo o tempo posible, lavado de mans, mantemento da distancia física, maximizar a ventilación e as actividades ao aire libre, minimizar o número de contactos e quedar na casa se hai síntomas, está diagnosticado ou se foi contacto estreito dun positivo.

Desprazamentos no período do Nadal

Nunhas datas de moitos desprazamentos, o documento expón que se eviten “aquelas viaxes que non sexan estritamente necesarias” e lembra que no caso de viaxar desde o estranxeiro, está en vigor desde este luns a obrigatoriedade de presentar unha PCR negativa realizada nas 72 horas previas á chegada a España.

En canto aos estudantes universitarios que regresan a casa para as vacacións, o borrador recoméndalles “que limiten as interaccións sociais os días anteriores do seu regreso a casa e que extremen as medidas de prevención”. E ademais, indica que limiten os seus contactos unha vez en casa, e interactuar sobre todo ao aire libre e usar máscaras.