Únete á nosa canle de Whatsapp
A Consellería de Política Social informou na tarde do luns da cancelación dun “obradoiro de astroloxía védica e meditación” que o Espazo Xove de Carballo programou no local, que depende da Dirección Xeral de Xuventude, Participación e Voluntariado da devandita consellería.
A actividade difundiuse a través das redes sociais do Espazo Xove, onde xa foi eliminada, e do web de Xuventude, e tiña previsto celebrarse de forma gratuita entre os días 4 e 25 de novembro. Estaba organizada por unha entidade local privada e dirixida a mozas e mozos de entre 14 e 30 anos.
Desde Política Social explican que en canto se tivo coñecemento da actividade, decidiuse a cancelación da mesma. “Non podemos permitir, e máis no momento actual, que se organicen actividades que fomenten as pseudociencias en espazos dependentes da Xunta”, expoñen desde a Consellería. Do mesmo xeito, lanzouse unha advertencia ás instalacións de toda Galicia para extremar a precaución antes de dar luz verde a este tipo de iniciativas.
O coñecemento da realización desta actividade, que anima a mergullarse, na “ciencia ancestral da India” xerou numerosas críticas nas redes sociais, xa que o cartel que anunciaba o obradoiro incluía os logotipos da Xunta de Galicia, a Dirección Xeral de Xuventude e do Xacobeo 2021. Sobre a razón pola cal se poden chegar a difundir estas disciplinas en espazos dependentes da Xunta, na Consellería aclaran que “cada Espazo Xove ten marxe e liberdade para programar as actividades que considere, sempre que non traspasen determinados límites, como aconteceu nesta ocasión, e por iso se ordenou a cancelación desta actividade”.
https://twitter.com/cescept/status/1318255172838170625
A astroloxía védica é unha baseada nos ritos e crenzas da civilización védica, e recolle algúns textos considerados sagrados por esta civilización, previa á instauración da relixión hinduista. Desde hai décadas, co predicamento acadado por ritos orientais no resto do mundo, a súa práctica popularizouse.
O episodio coincide coa publicación do primeiro manifesto internacional contra as pseudociencias, difundido nos últimos días. O texto, asinado por máis de 2.700 científicos de preto de 50 países, advirte contra os riscos de saúde pública que provocan estas disciplinas e insta aos gobernos a desenvolver leis que axuden a frear o problema.
