Únete á nosa canle de Whatsapp
Hai nenas que soñan con ser inventoras. Pero o que ás veces ignoran é que os inventos non sempre son obxectos; non sempre tanxibles. “Os métodos ou os algoritmos para a detección de pacientes son invencións tamén, pero non son artefactos como tales”, explica Diana Valverde, investigadora do Centro de Investigacións Biomédicas en Nanomateriais e Biomedicina (CINBIO). Este organismo da UVigo é un dos dez finalistas dun concurso organizado polo Día Internacional da Propiedade Intelectual que amosa cun vídeo a científicas con algún tipo de patente rexistrada. O fin é o de posicionar ás mulleres investigadoras como referentes de innovación e a transferencia dos resultados científicos á industria. O prazo de votación pechará o 23 de abril. Pódese votar vídeo do CINBIO desde este enlace.
A doutora Loretta de Chiara, inventora dun método non invasivo para o diagnóstico de cancro colorrectal e adenomas avanzados en pacientes asintomáticos e cofundadora da spin off do CINBIO, é a personaxe central do vídeo, pero a través dela queren destacar “todas as achegas que as investigadoras fan á sociedade e á economía grazas aos seus descubrimentos e innovacións nos sectores biomédico e sanitario”.
As doutoras África González, Diana Valverde, Herminia Domínguez, Verónica Salgueiriño, María Formoso, María Dolores Torres e Noelia Flórez, tamén investigadoras do CINBIO, forman parte da comunidade de inventoras con descubrimentos que axudan ao diagnóstico e prognóstico de diferentes enfermidades, así como con inventos de novos métodos de tratamento para diversos problemas de saúde humana.
“Creo que imos polo bo camiño e que toda esta visibilidade que lle estamos dando, quero pensar que estamos a servir de exemplo para as rapazas que están formandose véxannos como posibles impulsoras e directoras de todo o coñecemento que se poida xerar”, insiste Diana Valverde. “Inventor pódese ser de moitas formas”, pensa a investigadora, que contempla os resultados das súas investigación tamén como invencións e cunha aplicación directa na sociedade pola súa axuda no diagnóstico, no tratamento ou no pronóstico.
