Diego Peña presenta a participación do CiQUS no proxecto SPRING. Foto: Emilia Moreira.
Diego Peña presenta a participación do CiQUS no proxecto SPRING. Foto: Emilia Moreira.

A USC participa nun proxecto europeo sobre nanoimáns de grafeno

O investigador Diego Peña asistiu á presentación do consorcio SPRING, financiado pola convocatoria FET-Open no marco do Horizonte 2020

O investigador principal do CiQUS Diego Peña viaxou a pasada semana a San Sebastián para participar na reunión de lanzamento do novo consorcio europeo SPRING (SPin Research IN Graphene), un proxecto de investigación a 4 anos financiado con fondos comunitarios e coordinado polo CIC nanoGUNE. A lista de socios complétase co IBM Research, o Donostia International Physics Center (DIPC), a Universidade Técnica de Delft, a Universidade de Oxford e o propio CiQUS.

O consorcio dispoñerá dun total de 3’5 millóns de euros, financiados ao amparo do programa Horizonte 2020 no marco da convocatoria FET-Open; unha iniciativa que nace co obxectivo de apoiar proxectos de investigación interdisciplinarios de carácter altamente innovador, de alto risco pero con alto impacto, e coa que se pretende sentar as bases para facilitar o advenimiento de tecnoloxías radicalmente novas nun futuro próximo.

O proxecto SPRING combina os avances científicos alcanzados polos distintos membros do consorcio para fabricar nanoestructuras de grafeno magnético a medida, e probar o seu potencial como elementos básicos en dispositivos espintrónicos cuánticos, que basean o seu funcionamento no espín ou xiro (dito doutra forma, na rotación dunha partícula fundamental de materia sobre si mesma).

Por exemplo, en calquera material cada electrón leva asociada unha carga pero tamén un xiro, o cal desempeña un papel crave no magnetismo. O obxectivo último a longo prazo é desenvolver unha plataforma respectuosa co medio ambiente, que utilice o espín dos átomos para desenvolver unha nova xeración de dispositivos electrónicos, capaces de transportar, almacenar e procesar información.

Entre a comunidade científica xa hai consenso sobre o feito de que o espín é a propiedade ideal da materia para expandir a nanoelectrónica tal e como a coñecemos actualmente (é dicir, baseada na carga eléctrica), cara a unha clase de compoñentes máis rápidos, e de maior eficiencia enerxética (esta é, precisamente, a base dunha tecnoloxía emerxente coñecida como espintrónica cuántica). O proxecto SPRING investigará as leis fundamentais para crear e detectar os espines no grafeno, ou o que é o mesmo: ler e escribir espines para poder utilizalos posteriormente para transmitir información.

Diego Peña e José Ignacio Pascual, coordinador do proxecto desde o CIC nanoGUNE, explican que “o grafeno é ideal para aloxar espines e transportalos; este material ten o espesor dun único átomo e pode agora obterse con precisión submolecular, o que abre novas vías para fabricar estruturas cuxa forma, composición e disposición de espín sexan moi precisas e interconectadas por eléctrodos de grafeno”. “Se logramos obter estas estruturas serían de gran utilidade, xa que servirían de plataforma á segunda revolución cuántica, como os elementos qubit necesarios para a computación cuántica”, afirman.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.