Únete á nosa canle de Whatsapp
A proposta do investigador principal da área de eficiencia enerxética en edificación do Grupo de Tecnoloxía Enerxética da Universidade de Vigo, Enrique Granada, e dun dos seus directores, Pablo Eguía, o enxeñeiro industrial José María Alonso decidiu unir na súa tese de doutoramento, Análise da eficiencia enerxética en edificacións mediante técnicas de simulación térmica de edificios e interpolación avanzada de datos meteorolóxicos, dous campos de estudo que non foran tratados ata ese momento, nin no contexto internacional, de xeito conxunto: os erros cometidos utilizando as fontes típicas de datos meteorolóxicos e a transmisión destes erros ás simulacións térmicas transitorias de edificios.
Abordáronse dous campos de estudo apenas tratados: os erros na medición de datos e as súas transmisións ás análises
“Normalmente, para a análise da eficiencia enerxética en edificación utilízanse os datos da estación meteorolóxica máis próxima, ou incluso bases de datos a nivel global, que mesmo introducen máis erros nas simulacións dos edificios”, explica Alonso, que, para cumprir os obxectivos europeos de aforro enerxético para loitar contra o cambio climático, considera fundamental diminuír o consumo de enerxía dos edificios “xa que supoñen o 40% do consumo en Europa, incluso por riba do transporte ou a industria”.
A simulación térmica transitoria en edificación consiste en facer un modelo virtual dun edificio mediante un software de simulación que se poida calibrar, para que se asemelle o máximo posible ao funcionamento do edificio real que se quere representar e unha parte moi importante da calibración dese modelo é o estudo da influencia das variables meteorolóxicas no edificio. “Na maioría das ocasións utilízanse datos de estacións meteorolóxicas próximas, que poden estar a quilómetros de distancia e transmiten erros ás simulacións, que en moitas ocasións son importantes”, explica José María Alonso, que aclara que a interpolación avanzada de datos meteorolóxicos se refire á utilización de técnicas de interpolación para obter datos das seis variables que son de aplicación para as simulacións térmicas de edificios: temperatura, humidade relativa, presión, radiación solar e dirección e velocidade do vento. “Trátase de obter bos datos onde non dispoñemos de estacións meteorolóxicas na localización exacta dos edificios”, sinala o autor da tese, dirixida por Pablo Eguía e María Ángeles Saavedra.
Interese internacional
A transmisión do erro das variables meteorolóxicas á simulación térmica transitoria dun edificio e como diminuílo é a temática central da tese do enxeñeiro vigués, que conclúe que é posible dividir por tres o erro nas simulacións utilizando algunha das técnicas de interpolación de datos meteorolóxicos que propón, fronte ao uso de datos da estación meteorolóxica más próxima, o método máis estendido mesmo no ámbito internacional para obter os datos das variables meteorolóxicas para as simulacións térmicas transitorias en edificación.
“As técnicas de interpolación de datos meteorolóxicos que propoñemos e que mellor funcionan son as técnicas de Universal Krging utilizando predictores coma a altitude ou a distancia á costa e a técnica Thin Plate Splines”, detalla o investigador, que confirma o interese que esta conclusión espertou na International Energy Agency (IEA) que os invitou a expoñer a metodoloxía e conclusión da tese en próximas convencións da axencia, a través dun dos membros do tribunal que avaliou a investigación Aitor Erkoreka da Universidade do País Vasco e colider da subtask 2 do Annex58 da IEA, dentro do programa Energy Conservation in Buildings and Community Systems.
José María Alonso, que desenvolve a súa actividade profesional na división de enxeñaría de procesos e industria 4.0, dentro da área de I+D de Anfaco-Cecopesca, asegura que a utilización de técnicas de simulación térmica e a interpolación avanzada de datos meteorolóxicos “non só é que non sexa habitual, é que cando analizamos o estado da arte a nivel internacional antes de comezar a investigación, non existía bibliografía científica que abordase a relación entre estes dous conceptos. Aínda a día hoxe, buscando nas bases de datos bibliográficas das editoriais de referencia científica a nivel internacional, non existen estudos comparables aos nosos”, asegura.
