A pandemia restou expresividade aos rostros. Agora, aínda nun contexto de crise sanitaria, deseñan unha máscara hixiénica que facilita a lectura dos labios e a identificación das emocións. Trátase dunha iniciativa desenvolvida polo CSIC e pola súa empresa spinoff Bioinicia, que impulsan unha máscara de nanofibras e filtro viricida que está na fase de probas. Caracterízase por ter un frontal transparente, permitindo que o interlocutor vexa a boca do emisor.
Segundo informan dende o CSIC, xa existen outras máscaras no mercado con esta pantalla frontal transparente. Mais estas son as primeiras en contar co filtro Proveil, que dispón de todas as propiedades da nanofibra e incorpora as súas propiedades viricidas, capaces de desactivar calquera virus ou bacteria. O deseño xa foi certificado polo Instituto Tecnolóxico Téxtil AITEX e aínda que se atopa nunha primeira fase onde non se comercializará en aberto, séguese traballando co colectivo de persoas xordas na súa mellora e na súa automatización para a produción en masa.
Asegurar a protección
“Quixemos incorporar todos os beneficios do noso filtro a unha máscara cunha xanela transparente para, ademais de asegurar a protección de quen a leva, tamén facilitar a lectura dos beizos”, aclara Jorge Teno, investigador de Bioinicia. En estudos certificados externos e internos púidose medir que esta máscara conta “cun 90% de eficiencia de filtración fronte a aerosois e un 98% de eficiencia de filtración bacteriana, ademais das propiedades viricidas e antibafo coas que conta a máscara”.
“Atopámonos nunha primeira xeración, onde a máscara se manufacturará e se fará chegar a persoas e institucións para a súa validación. Ademais, xa demos os pasos para conseguir unha segunda versión que automatice a súa fabricación, e ata unha terceira fase que nos axudará a facela moito máis sostible xa que será compostable”, explicou José María Lagarón, científico do CSIC.
“A máscara conta cun 90% de eficiencia de filtración fronte a aerosois”
Tamén engadiu que “a nosa máscara protexe, pero hai que ser consciente de que esta protección só se garante se a axustamos ben ao rostro e se combina en interiores con ventilación ou equipos de limpeza do aire. Por iso seguimos traballando para sacala en formato EPI, con máis tallas, e así asegurar que todo o mundo poida ler os beizos ademais de estar protexido”.