O método está inspirado na detección molecular de vida en ambientes extremos.
O método está inspirado na detección molecular de vida en ambientes extremos.

Un test da Covid-19 baseado na detección de vida extraterrestre

O CiMUS de Santiago de Compostela participa no deseño para detectar anticorpos do SARS-CoV-2 cunha técnica molecular de fluorescencia

Un método usado para atopar rastros moleculares en ambientes extremos noutros planetas, como Marte, pode axudar tamén a combater a pandemia da Covid-19. É o que atopou un equipo multidisciplinar de científicos españois, nos que se inclúen investigadores do Centro de Investigación en Medicina Molecular e Enfermidades Crónicas (CiMUS) de Santiago de Compostela: os ensaios que levan perfeccionando durante case 20 anos no Centro de Astrobioloxía (CAB) do Instituto Nacional de Técnica Aeroespacial (INTA-CSIC) para desenvolver inmunoensaios fluorescentes e instrumentación para detectar vida extraterrestre aplicaranse agora ao combate do SARS-CoV-2. A adaptación deste coñecemento ao novo coronavirus permitiu “desenvolver, poñer a punto e validar un ensaio serolóxico mediante o uso de microarrays (biochips) de proteínas do virus SARS-CoV-2, segundo anunciou este mércores o CSIC.

O proxecto, denominado SCOVAM (de SARS-CoV-2 Antigen Microarray), é un ensaio mediante o método de fluorescencia para detectar simultaneamente os anticorpos de tipo IgM e IgG en soro de pacientes. O método de detección por fluorescencia é máis lento (unhas tres horas, aproximadamente) có test rápido (ou de fluxo lateral) pero, a cambio, é moito máis sensible (é capaz de detectar unha cantidade menor de anticorpos), é semicuantitativo, escalable e automatizable, xa que se pode operar en formato múltiple (ata 96 mostras simultaneamente, como o clásico ensaio ELISA) e os datos quedan almacenados en soporte dixital.

Vantaxes

Os impulsores do proxecto salientan que o método que idearon ofrece algunhas diferenzas cos outros. “Unha vantaxe de SCOVAM, respecto doutros métodos de detección de anticorpos como ELISA, é que utiliza varias das proteínas do virus para capturar os anticorpos presentes no soro sanguíneo que son capaces de unirse de forma específica ao SARS- CoV-2. Ter varias proteínas virais como ‘anzol‘ permite a identificación de patróns antixénicos do virus, debido a que cada persoa pode desenvolver unha resposta de anticorpos diferente fronte ás distintas proteínas”, explica Víctor Parro, investigador do CAB. Engade Parro que “no caso de que futuras investigacións identifiquen marcadores preditivos da evolución da enfermidade, SCOVAM podería adaptarse e actualizarse para a detección simultánea de anticorpos e devanditos marcadores (por exemplo, marcadores de inflamación).

Imaxe de fluorescencias obtida co método SCOVAM tras a análise de dúas mostras, unha negativa (esquerda) e outra positiva. Os rectángulos amarelos enmarcan as proteínas do virus inmobilizadas en SCOVAM, por duplicado, e dúas concentracións diferentes. Os puntos verdes determinan a presenza do anticorpo IgG (infección 'pasada'), que na imaxe domina sobre IgM (infección 'temperá'). As columnas de puntos verticais de intensidade decrecente son marcadores de cada tipo de anticorpos, e os pares de puntos vermellos das esquinas son marcadores de posición. Fonte: CAB-INTA-CSIC.
Imaxe de fluorescencias obtida co método SCOVAM tras a análise de dúas mostras, unha negativa (esquerda) e outra positiva. Os rectángulos amarelos enmarcan as proteínas do virus inmobilizadas en SCOVAM, por duplicado, e dúas concentracións diferentes. Os puntos verdes determinan a presenza do anticorpo IgG (infección ‘pasada’), que na imaxe domina sobre IgM (infección ‘temperá’). As columnas de puntos verticais de intensidade decrecente son marcadores de cada tipo de anticorpos, e os pares de puntos vermellos das esquinas son marcadores de posición. Fonte: CAB-INTA-CSIC.

SCOVAM foi posto a punto con mostras de soros positivos e negativos ( pre-pandemia e durante a pandemia) previamente analizados por dous métodos comerciais (ELISA e quimioluminiscencia). O grupo de soros positivos tamén fora ensaiado previamente por probas RT-PCR (transcrición reversa axustada á reacción en cadea da polimerasa) para detectar a presenza do virus en mostras naso- faríngeas. O método desenvolvido no CAB mostra unha coincidencia superior ao 91% cos test comerciais e, en varios casos, corrixe os resultados de falsos negativos da PCR. Hai que destacar que o 9% de discrepancias poden ser atribuídas tanto ao método SCOVAM como ao comercial, xa que todos os métodos teñen un rango de incerteza que impide distinguir un resultado positivo do resultado producido polos soros negativos.

Segundo advirten os impulsores do traballo, a posta a punto de métodos de detección de antíxenos virais (incluído o ARN mediante RT- PCR) e serolóxicos pode estar nesgada se só se usan mostras de persoas ingresadas ou do colectivo sanitario. Por iso, actualmente o CAB e o laboratorio de microbioloxía do Hospital Central da Defensa “Gómez Ulla” están a realizar un estudo serolóxico aleatorio e voluntario co fin de validar SCOVAM sobre unha mostra sen rumbo aparente. Ademais de pescudar a incidencia da Covid-19 neste colectivo, medirase a carga inmunolóxica fronte ao virus ao longo do tempo, de xeito que poida inferirse tanto o título (a concentración de anticorpos) como a súa prevalencia en sangue.

SCOVAM é unha potente ferramenta para estudar a existencia de patróns antíxeno-anticorpo entre os soros positivos e mesmo para inferir as interaccións con maior capacidade neutralizante. Á súa vez, SCOVAM podería ser usado como método de seguimento da efectividade das futuras vacinas, nas diferentes fases de estudo e/ou de aplicación.

No proxecto de desenvolvemento de SCOVAM participaron científicos do grupo de Luis Enjuanes, que lidera a investigación dunha das vacinas fronte ao SARS-CoV-2, que achegaron as mostras de ARN, así como o Hospital Central da Defensa “Gómez Ulla”, que proporcionou mostras e estudos comparativos; o Centro de Regulación Genómica (CRG) de Barcelona; o CIMUS da Universidade de Santiago de Compostela; o Centro Nacional de Biotecnología (CNB-CSIC); e a empresa Eurofins-Ingenasa, que proporcionaron proteínas do virus para os ensaios.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.