Únete á nosa canle de Whatsapp
A carreira espacial chinesa na cara oculta da Lúa non deixa de achegar novos datos. Despois de que a Chang’e 4 se convertera na primeira nave en chegar a esta parte do satélite, o camiño da sonda Yutu-2 acaba de amosar novas e misteriosas imaxes: unha substancia estraña, cualificada como un tipo de “xel” e cunha curiosa cor, detectada por este vehículo lunar.
O programa de exploración lunar de China acaba de publicar unha nova foto deste material. Está tomada pola cámara principal da sonda, e amosa o centro dun cráter cun material cunha cor distinta á dos seus arredores, e contén puntos brillantes.
Segundo as investigacións realizadas, o probable é que se traten dos restos dun impacto na superficie do satélite; un fenómeno que xa atoparan os astronautas dos Estados Unidos durante a misión Apolo XVII, tal e como recolle Space.com. Daquela, en 1972, unha mostraxe da substancia foi recollida por un dos astronautas da NASA, e concluíuse que eran fragmentos de minerais diversos que se consolidaron nun cristal negro e brillante.
Nesta ocasión, o investigador do Goddard Space Flight Center da NASA, Dan Moriarty, analizou e procesou a imaxe: “Creo que a información máis confiable aquí é que a substancia é relativamente escura. Parece ter un material máis brillante incrustado nas rexións máis grandes e escuras, aínda que existe a posiblidade de que a luz brille nunha superficie lisa”.
Nas condicións nas que se atopa o satélite, os impactos de meteoritos a altas velocidades poden presurizar minerais en vidro brillante que, en ocasións, refractan a luz con formas sorprendentes.
Agora mesmo os responsables da Axencia Espacial Chinesa están á espera de que Yutu-2 se reactive despois de dúas semanas de hibernación para seguir estudando este composto. Nas semanas anteriores, Yutu-2 estivo intentando achegarse ata a a zona, xa que se atopaba dentro dun cráter.
