Únete á nosa canle de Whatsapp
A rede sísmica do Instituto Geográfico Nacional deu conta na noite de onte dun leve sismo de magnitude 2,3 na península do Barbanza. O epicentro tivo lugar no termo municipal de Lousame, preto do monte Iroite, ás 22.35 da noite.
Debido á súa pouca magnitude, non foi percibido pola poboación, ou alomenos, o IGN non recibiu ningún aviso do sismo. O do Barbanza o primeiro movemento tectónico rexistrado en Galicia despois do que tivo lugar o pasado día 17 en Melgaço, na raia con Portugal, e que xerou centos de avisos ao percibirse con claridade en todo o sur de Galicia. Tivo magnitude 3,8 aínda que a súa intensidade (que serve para clasificar un sismo en función dos seus efectos nas persoas, nos edificios e obxectos e na natureza), acadou a escala IV.
