A investigadora Helena Peñas González, membro da agrupación estratéxica de investigación centrada nas tecnoloxías ambientais Cretus da Universidade de Santiago de Compostela, demostrou na súa tese de doutoramento unha nova estratexia para aplicar técnicas de extracción integradas ao proceso de fermentación de biobutanol. Como biocarburante, o butanol presenta importantes vantaxes con respecto ao bioetanol, tales como unha gran densidade enerxética ou unha resposta no motor máis próxima á da gasolina, aínda que é custosa.
Explica Peñas que o custe é maior “xa que se leva a cabo por medio de bacterias do xénero Clostridia que son fortemente inhibidas polo seu propio produto. Unha forma de combater este problema pasa por eliminar o produto tóxico do medio a medida que é producido; este é o obxectivo das separacións integradas”, explica a científica.
A investigadora centrouse na selección de disolventes de extracción adecuados para a fermentación, tanto pola súa capacidade separativa como pola súa biocompatibilidade. As investigacións realizadas permitiron demostrar a validez dunha separación integrada con aceites vexetais de orixe natural para incrementar en mais de 60% a concentración final de biobutanol, reducindo de maneira notable o consumo de auga. Ademais, viuse que a utilización de disolventes específicos de gran capacidade separativa, como o 2-butyl-1-octanol, permite mellorar o rendemento en butanol, o cal se traduce nunha economía de ata o 40% en materias primas, con respecto ao proceso convencional.
A tese, titulada ‘Solvent-based approaches to evaluate the ABE extractive fermentation’, foi cualificada con sobresaliente Cum laude polo tribunal presidido por Francisco Valero Barranco, catedrático de Enxeñaría Química da Universidade Autónoma de Barcelona; Nicolás Lopes Ferreira, investigador senior de Biotecnoloxía, Microbioloxía e Bioloxía Molecular do grupo IFP Energies Nouvelles de Francia; e polo investigador postdoutoral de Enxeñaría Química da USC, Miguel Mauricio Iglesias.
O traballo desenvolveuse dentro do Grupo de Biotecnoloxía Ambiental do Departamento de Enxeñería Química e foi dirixido polo investigador Thelmo Lú Chau e o profesor Juan M. Lema Rodicio. Ademais, contouse coa participación dun centro de referencia internacional no ámbito da enerxía, o IFP Energies Nouvelles de Francia.