Únete á nosa canle de Whatsapp
O investigador principal do CiMUS da USC Rubén Nogueiras foi recoñecido cun dos galardóns para persoal investigador da endocrinoloxía máis importantes do mundo, o European Journal of Endocrinology Award que outorga a Sociedade Europea de Endocrinoloxía.
Este premio recoñece o labor de científicos menores de 45 anos que contribuísen significativamente ao avance do coñecemento no campo da endocrinoloxía a través de publicacións. O científico do CiMUS recibe este galardón polo seu traballo pioneiro sobre o papel do sistema nervioso central no control da homeostasis enerxética e o seu impacto na obesidade e as súas complicacións metabólicas.
Rubén Nogueiras suma así o seu nome a unha lista de destacados expertos a nivel internacional entre os que figuran tamén o investigador principal do CiMUS, Miguel López, ou o investigador do CIBEROBN, Manuel Tena-Sempere. O acto de entrega terá lugar durante a celebración do vindeiro Congreso Europeo de Endocrinoloxía que levará a cabo en maio do próximo ano en Praga.
Doutor en Bioloxía pola USC, Rubén Nogueiras completou a súa formación en diferentes laboratorios de Alemaña, Suíza e Estados Unidos. Membro tamén do CIBER de Obesidade e Nutrición (CIBEROBN) e do IDIS, no CiMUS coordina o grupo de Metabolismo Molecular, centrado no estudo dos mecanismos moleculares implicados na obesidade e as súas enfermidades asociadas como a diabetes tipo 2 e a enfermidade do fígado graxo non alcohólico.
Asesor de proxectos nacionais e internacionais, conta con máis de 210 publicacións científicas en revistas de alto impacto e foi recoñecido con prestixiosos galardóns como o Premio Novo Investigador de Ciencias Básicas da Asociación Europea para o Estudo da Obesidade ( EASO) (2009), o Premio da Revista de Endocrinoloxía Molecular (2011), o Premio Novo Investigador Sociedade Española de Bioquímica e Bioloxía Molecular (SEBBM) (2015), Fundación Europea para the Study of Diabetes (EFSD) Rising Star Fellowship (2015), Premios Novos Investigadores Fundación AstraZeneca (2016), Premio Fundación Dr. Antonio Esteve (2017), Bolsa Leonardo, Fundación BBVA (2018), Premio Constantes e Vitais Novo Talento en Investigación Biomédica (2018), Premio á Investigación Básica da Sociedade Europea de Investigación Clínica (ESCI) (2019).
