Xoves 28 Marzo 2024

Premio para unha alumna ourensá por un estudo sobre o pé dos adolescentes

“¿E ti, como pisas?” é o título do estudo co que Iria Ollero, alumna das Aulas Tecnópole e estudante de 2º de Bacharelato no IES As Lagoas (Ourense), levou o segundo premio do certame estatal Jóvenes Investigadores, celebrado hai uns días en Málaga. Este traballo fora xa recoñecido co primeiro premio na categoría Biomedicina e Saúde do evento Ciencia en Acción 2017, celebrado o pasado mes de outubro en Euskadi.

Iria Ollero presume do seu título.
Iria Ollero presume do seu título.

Durante cinco días, os 255 participantes, estudantes de entre 15 e 20 anos procedentes de toda España, defenderon os seus proxectos diante dun esixente xurado, competindo polos premios finais. O certame, organizado polo Instituto da Xuventude e o Ministerio de Educación, Cultura e Deporte, celebrou nesta edición o seu 30 aniversario.

Publicidade

Este é o oitavo premio que Iria Ollero acumula desde que comezou a asistir hai catro anos ás Aulas Tecnópole, a iniciativa promovida por Parque Tecnolóxico de Galicia, co apoio da Axencia Galega de Innovación (GAIN) da Xunta, para incentivar as vocacións científicas e innovadoras entre os más novos a través do desenvolvemento de proxectos co apoio de titores expertos.

Do estudo de Iria, realizado durante o último ano, despréndese que un 88% dos adolescentes pisa incorrectamente, cunha mala distribución do peso corporal, e, ademais, a maioría (74%) non é consciente do seu problema. Sobre unha mostra de 33 persoas de entre 11 e 18 anos, a moza investigadora levou a cabo unha exhaustiva análise consistente nunha enquisa e catro probas realizadas con tecnoloxías desenvolvidas por ela mesma.

Coa primeira, obtivo o negativo da pisada de cada persoa para ver con que parte do pé exercía maior presión. A segunda permitiulle coñecer a distribución do peso corporal do individuo nos pés. Coa terceira puido ver a pegada dixitalizada de cada persoa grazas a unha placa electrónica. E a cuarta  permitiulle a través dun sensor, medir a tensión muscular no tendón de Aquiles.

Ollero deseñou un sistema dixital para analizar a pegada e atopar defectos

Os resultados das diferentes probas desvelaron que un bo número de adolescentes exercen moita presión coa deda gorda, o que pode ocasionar moitos problemas co tempo. Ademais, dos suxeitos da súa mostra, o 54% ten o pé cavo, o 19% plano e só o 27% un pé normal.

“Desde sempre tiven moito interese polos pés e a pisada porque nacín cunha malformación nos meus”, explica Iria sobre a orixe da idea do seu proxecto. “A miña participación nas Aulas Tecnópole foi fundamental para levalo a cabo. Permitiume coñecer o método científico e ter o apoio continuado do meu titor, David Ballesteros”.

Iria, que de cara ao futuro está considerando dedicarse á investigación no ámbito da saúde,  conseguiu desde que asiste ás Aulas Tecnópole o 2º Premio Luis Freire, catro recoñecementos na maior feira científica a nivel estatal (Exporecerca) e un terceiro premio no anterior certame de Jóvenes Investigadores. Os traballos que lle valeron estes galardóns foron un kit de baixo custo para realizar prácticas de xenética e un sistema electrónico de alerta temperá que permite minimizar os efectos das riadas sobre a poboación en risco, ambos realizados en equipo con outros estudantes das Aulas Tecnópole.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A falsa endemia de malaria e outros intentos para desecar a lagoa de Antela

A partir do século XVIII a zona húmida foi considerada inimiga da agricultura. Os veciños intentaron evitar o desaugamento das terras que utilizaban para o pastoreo

Galicia superará os 40 graos durante a cuarta onda de calor da península

O sur de Pontevedra a Ourense serán as zonas máis afectadas durante un episodio de calor intenso que durará ata o xoves

Alerta por 19 positivos por tuberculose en Ourense: estes son os seus síntomas

Un infectado contaxiou a case unha vintena de alumnos do IES Julio Prieto Nespereira que, de momento, non desenvolveron a enfermidade

Sen inflamación e sen dor: unha nova técnica axiliza a recuperación das hernias de disco

O Parque Tecnolóxico de Galicia acolle este venres unha formación dirixida a traumatólogos e neurocirurxiáns de todo o país