Venres 29 Marzo 2024

Os galegos son os que menos confían nos relixiosos en España

A enquisa de Percepción Social da Ciencia e a Tecnoloxía 2018, presentada este xoves polo ministro de Ciencia, Innovación e Universidades, Pedro Duque, racha cun dos tópicos que se transmiten ás veces dentro e fóra de Galicia sobre os cidadáns e cidadás do país. Así, segundo a análise detallada por comunidades autónomas, Galicia é a que menos confianza ten nos relixiosos e relixiosas.

Das persoas ás que se lle preguntou, un 73,6% dos galegos e galegas respondeu que confía “pouco” (26,2%) ou “moi pouco” (47,3%) nos cregos, monxas e calquera outro representante dos poderes relixiosos. E só un 7,7% parece disposto a manter un certo grao de apoio cara a eles: apenas un 3,2% dos galegos cre “moito” nos mensaxeiros de Deus; e outro 4,5%, bastante.

Publicidade

Na escala do 1 ao 5 (sendo 1 moi pouco e 5 moito) a confianza dos galegos e galegas nos relixiosos está no 1,9, notablemente por debaixo da media estatal (2,4), e Galicia é a única comunidade que se sitúa por debaixo do 2. Cabe subliñar que aínda que en Cantabria a valoración é aínda menor (1,6) a pequena mostra obtida desta comunidade (38 persoas), expón, segundo remarca a enquisa, que a error de mostraxe está por riba do 10%, fronte ao 5% de Galicia.

Moita confianza nos científicos

O cuestionario, elaborado polo instituto Ikerfel a encargo da Fundación Española de Ciencia y Tecnología (Fecyt), amosa, do mesmo xeito, que en Galicia se confía bastante no labor dos científicos. O 93,5% afirma crer “moito” ou “bastante” neles, cun grao de 4,6 sobre 5, tamén por riba da media estatal (4,5). Un 5,1% di confiar “algo” e apenas un 1,4% manifesta que cre “pouco” (0,7%) ou “moi pouco” (0,7%) a quen fai a ciencia.

Dinosauros e heliocentrismo

Non saen tan ben parados os galegos e galegas noutras das cuestións que se realizan na enquisa. Para valorar a alfabetización científica dos cidadáns, a Fecyt inclúe preguntas sobre o Sistema Solar, as froitas transxénicas ou a época na que viviron os dinosauros. Neste senso, o 16,2% dos galegos cre que humanos e dinosauros conviviron nalgún momento sobre a Terra, fronte ao 15% da media estatal, aínda que lonxe de Castilla La-Mancha ou Catalunya, onde case unha de cada catro persoas (23,2% e 23,3% respectivamente) cren que o que se ve en Parque Xurásico ten algo de certo.

Outra das cuestións que presenta a Fecyt é sobre o heliocentrismo. Un 11,9 % dos españois e un 11,2% dos galegos cre que o Sol xira arredor da Terra, aínda que a opinión maioritaria, preto do 90%, apoia o que xa defenderon Copérnico ou Galileo hai varios séculos. Con todo, hai casos preocupantes, como os de Murcia, onde un 26,5% dos cidadáns cren que é o Sol quen se move arredor de nós.

Pseudociencias

Outro dos aspectos nos que a enquisa fai fincapé é o das pseudociencias, despois de presentar un plan para impedir que se practiquen nos hospitais, algo que está xerando un importante en prácticas como a acupuntura. Nesta terapia tradicional china, os galegos son dos que a consideran menos “científica”: un 17,9% cre que é “totalmente ou bastante” científica, fronte ao 24% do conxunto de España, e dun 37,7% en Catalunya, onde o apoio é maior. Un 31,9% cre que ten “algo” de evidencia, e un 50,3% di que pouco ou nada.

Un 27,6% dos galegos recoñece ter probado a homeopatía ou a acupuntura, fronte ao 19,6% da media estatal

Respecto da homeopatía, unha pseudoterapia na que o consenso científico é absoluto desbotando calquera tipo de beneficio para a saúde, un 18% dos galegos cre que é “bastante” ou “totalmente” científica, mentres que que un 56,6% desbota unha evidencia perceptible.

Porén, aínda que a visión dos galegos destas terapias é relativamente escéptica dentro do marco estatal, a porcentaxe de galegos que as probou é maior (un 27,6% fronte ao 19,6% da media)

Sobre as vacinas e a quimioterapia, o apoio á evidencia científica destas prácticas é moi maioritaria, do mesmo xeito que no resto de comunidades autónomas. Un 91,1% apoia “totalmente” ou “bastante” a evidencia científica das vacinas, e un 87% no caso da quimioterapia. Porén, hai un 3% de galegos e galegas que cren que as vacinas funcionan “pouco ou nada” e un 4,1% que opinan así da quimioterapia.

Podes consultar a enquisa de Percepción Social da Ciencia e a Tecnoloxía 2018 na web da Fecyt.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde

Identificado un novo campamento romano na fronteira entre Galicia e Portugal

Un equipo de arqueólogos detecta un posible recinto fortificado de tres hectáreas de extensión datado entre os séculos I a.C. e I d.C.