Gabriele Veneziano, pai da teoría de cordas. Foto: Università de Firenze.

Gabriele Veneziano, pai da teoría de cordas. Foto: Università de Firenze.

Gabriele Veneziano, ‘pai’ da teoría de cordas, visita Galicia

Ofrecerá o luns 12 de novembro unha charla no auditorio Abanca de Santiago, convidado polo Instituto de Física de Altas Enerxías

A teoría de cordas é un modelo co que se pretende explicar a orixe das partículas elementais que configuran a materia, todo o que coñecemos e somos. Segundo os seus postulados, asúmese que as partículas non son puntos cunha determinada estrutura, senón que en realidade trátase dunha especie de “vibracións”. E un dos seus ‘pais’, o físico italiano Gabriele Veneziano (Florencia, 1942) estará en Galicia a vindeira semana.

En 1968, con 26 anos, atopou os datos precisos para formular o modelo da teoría de cordas

Veneziano desenvolveu a súa carreira nalgúns dos centros de investigación máis prestixiosos do mundo, como o Massachusetts Institute of Technology (MIT) e o CERN. Neste último centro, en 1968, acadou os achados cos que formulou a súa célebre teoría. Grazas a isto, recibiu ao longo da súa carreira premios como o Pomeranchuk ou as medallas Albert Einstein e Oskar Klein.

A visita de Veneziano a Galicia enmárcase na Semana da Ciencia que organiza o Instituto Galego de Fïsica de Altas Enerxías (IGFAE). O luns 12 de novembro, ás 20 horas no Auditorio Abanca, o físico italiano ofrecerá a conferencia “Teoría de cordas: vida, morte e milagres”, unha sesión aberta ao público xeral na que explicará as bases do modelo que propuxo. Haberá tradución simultánea do inglés.

Dentro da Semana da Ciencia organizada polo IGFAE, terá tamén lugar a entrega dos premios do concurso de divulgación científica convocados polo Instituto. O acto celebrarase o xoves 15 de novembro ás 18 horas na Aula Magna da Facultade de Física. O prazo aínda está aberto, ata o 8 de novembro.

NerdNite sobre teoría de cordas

Por outra banda, para achegar aínda máis a teoría de cordas ao público, a NerdNite de novembro, que se celebra o martes 13 ás 21 horas na Nave de Vidán, terá unha sesión especial dedicada ao modelo proposto por Veneziano.

Falarán Javier Mas Solé, profesor de Física Teórica da USC, coa charla “O discreto encanto do cuanto”, José Edelstein, docente do mesmo departamento, coa charla “Como dous estraños”, e o catedrático Alfonso Vázquez Ramallo, que falará de “As supercordas e os cabos soltos da Física”.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.