Variación espacial do índice de aptitude do clima (a maior valor, maior aptitude) para vivir en función das preferencias da poboación galega e das condicións climáticas do territorio. Autor: Dominic Royé.

Variación espacial do índice de aptitude do clima (a maior valor, maior aptitude) para vivir en función das preferencias da poboación galega e das condicións climáticas do territorio. Autor: Dominic Royé.

Este é o clima que prefiren os galegos

Veráns e invernos suaves, moito sol, pouca chuvia e pouco vento, as preferencias da poboación galega, segundo un estudo da USC

Agora que chega a chuvia do outono, hai división de opinións na sociedade galega. Unhas persoas prefiren que chegue a hora do paraugas e o abrigo, e outros, se por eles fose, seguirían nun clima de verán eterno todo o ano. Pero, cal é realmente a preferencia climática dos galegos? Os investigadores Alberto Martí e Damián Caballero decidiron realizar unha enquisa para responder esta cuestión e outras, como cal sería o lugar de Galicia coa mellor aptitude climática.

Os datos revelan que o clima ideal para unha maioría da poboación galega sería aquel con veráns con temperaturas suaves, moitas horas de sol e poucos días de choiva, e invernos suaves, ademais de ventos frouxos ou escasos e unha humidade media/baixa, segundo contan desde a USC.

Cualidades climáticas preferidas polos galegos e galegas para o lugar onde vivir. Fonte: USC.

Cualidades climáticas preferidas polos galegos e galegas para o lugar onde vivir. Fonte: USC.

Diferenzas e paradoxos do clima

Porén, os investigadores atoparon tamén distintas preferencias sobre o clima en función do xénero, a idade ou o lugar de residencia. As mulleres, a poboación urbana e a costeira prefiren poucos días de choiva. Non en tanto, os homes das zonas rurais prefiren invernos fríos. E as mulleres e persoas de máis de 70 anos prefírenos suaves.

Por outra banda, a poboación urbana prefire os veráns cálidos, algo do que escapan as persoas maiores de 70 anos, “seguramente polos efectos prexudiciais das altas temperaturas sobre a súa saúde”, explican os autores do estudo.

Tamén son curiosas outras respostas, como as que indican que moitos dos participantes na enquisa escollen condicións climáticas opostas ao lugar no que viven. Así, na provincia de Ourense prefiren veráns suaves, pero os de Lugo decántanse polos estíos calorosos e os invernos suaves.

Os mellores e os peores lugares

Así, coas respostas obtidas, os investigadores tamén puideron determinar os espazos con maior aptitude climática. Son as áreas das rías de Vigo, Pontevedra e Arousa e os concellos do Baixo Miño, entre Tui e A Guarda. Segundo explican os autores do estudo, a proximidade do mar “favorece a moderación das temperaturas durante todo o ano e ambientes suaves tanto en verán como en inverno, ademais dunha maior insolación”.

Unha situación semellante dase na comarca do Bolo, o Val do Bibei, e zonas de mediana altitude na Baixa Limia, en Ourense, grazas á elevada insolación, a pouca chuvia e as máximas suaves debido ao efecto da altitude.

No lado contrario, as zonas máis desapacibles de Galicia son as áreas de clima de montaña, como a Serra de Ancares, Macizo de Trevinca ou en Cabeza de Manzaneda, e o norte das provincias de Lugo e A Coruña (serras da Faladoira, Xistral, Lourenzá ou Meira), debido á abundante nubosidade e ás poucas horas de sol, ás que hai que engadir un maior número de días de choiva, invernos moi fríos e veráns frescos.

Ademais, o estudo indica que a maior parte do interior de Galicia presenta uns valores de aptitude climática intermedios. Nuns casos debido á maior frecuencia de días de precipitación, á menor insolación e a temperaturas invernais baixas ou moi baixas, como o interior das provincias da Coruña e Lugo. Noutros, polos valores térmicos extremos que teñen lugar, tanto en inverno como, sobre todo, en verán, como é o caso das depresións interiores de Monforte, Verín e Ourense, o val do río Miño ao seu paso polas comarcas de Ribeiro, Paradanta e Condado, o val do río Sil en Valdeorras ou o do Tea ao sur da provincia de Pontevedra, onde os veráns acostuman ser moi calorosos.

Unha resposta a “Este é o clima que prefiren os galegos”

  1. Ángeles Sánchez

    Paréceme una estupidez , se non chovera e fixera moito sol non sería Galicia , sería Andalucia. Non tedes nin idea do que decís , temos un boísimo clima , sen extremos , excepto en algunas zonas de Ourense e Lugo.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.