Dous proxectos biomédicos galegos reciben o pulo de “la Caixa” para chegar á sociedade

As investigacións de Angélica Figueroa (INIBIC) e Ezequiel Álvarez (USC) estudan as metástases do cancro de colon e fármacos cardiovasculares

Angélica Figueroa e Ezequiel Álvarez lideran os proxectos financiados por
Angélica Figueroa e Ezequiel Álvarez lideran os proxectos financiados por "la Caixa". Foto: INIBIC / Santi Alvite (USC).

Os equipos que lideran Angélica Figueroa, do Instituto de Investigacións Biomédicas da Coruña (INIBIC) e Ezequiel Álvarez (USC) son os dous proxectos galegos seleccionados nas convocatorias de apoio á investigación da Fundación “la Caixa” que fomenta a innovación e a transferencia tecnolóxica  para chegar á sociedade e ao mercado no ámbito da biomedicina.

A través de Caixa Research Consolidate, unha das liñas de financiamento, destinada a “iniciativas máis maduras ás que se quere axudar para achegarse ao investimento comercial”, a fundación bancaria escolleu tres proxectos entre os 39 presentados. Un deles, que recibirá 300.000 euros, é o de Angélica Figueroa, co que se pretende deseñar un inhibidor dirixido para deter as metástases do cancro de colon. Na convocatoria Caixa Research Validate, entre os 17 seleccionados de 97 presentados está o de Ezequiel Álvarez, profesor da Facultade de Farmacia da USC, que ensaiará un vaso sanguíneo nun chip para o descubrimento de novos fármacos cardiovasculares. Para desenvolver o traballo recibirá ata 100.000 euros de financiamento.

Alén do apoio económico, as investigacións recibirán tamén acompañamento en formación especializada como a traansferencia de tecnoloxía, ferramentas de negociación e financiamento ou mentoría con expertos destes sectores.

Metástase do cancro de colon

Tal e como explica “la Caixa”, “preto de 10 millóns de persoas morreron de cancro en 2020, unha cifra que fai desta enfermidade unha das principais causas de morte en todo o mundo”. Un 90% destas mortes foron causadas por metástase, a propagación do tumor orixinal a outras partes do corpo. As terapias contra as metástases seguen sendo limitadas, polo que o cancro adoita ser considerado unha enfermidade incurable cando alcanzou a fase metastásica, o que supón un dos grandes retos da oncoloxía.

Así, o equipo de Angélica Figueroa no INIBIC identificou “unha prometedora diana terapéutica cunha elevada expresión nas células tumorais cando estas evolucionan a células metastásicas“, e actualmente están a desenvolver un fármaco que inhibe a metástase en o cancro de colon. E grazas a o seu mecanismo de acción, é posible que tamén sexa posible utilizalo noutros tipos de carcinomas. O desenvolvemento de un novo tratamento antimetástase terá unha gran influencia na oncoloxía de precisión e beneficiará aos pacientes con cancro.

Un chip para atopar fármacos cardiovasculares

No caso do proxecto liderado por Ezequiel Álvarez, a investigación enmárcase no contexto de que “só o 60 % dos fármacos que superan os estudos preclínicos conseguen finalizar con éxito os ensaios clínicos de fase I”, o que “suxire que os ensaios preclínicos, como os cultivos celulares en 2D e os modelos animais, poden ser insuficientes para predicir a resposta e a toxicidade dos fármacos en humanos”.

Dest xeito, “o desenvolvemento da tecnoloxía de órgano nun chip, que permite o cultivo de células humanas dun ou varios órganos en condicións fisiolóxicas, facilitou que os investigadores poidan levar a cabo estudos con un alto grao de control e reproducibilidade, que reflicten de forma precisa o funcionamento interno dos seres humanos”.

Porén, esta tecnoloxía aínda non está suficientemente desenvolvida para a súa aplicación ao descubrimento e cribado automatizados de fármacos, un paso crucial no desenvolvemento farmacolóxico”. Así, o principal obxectivo do proxecto da USC é “desenvolver un ensaio farmacolóxico automatizado que permita probar os efectos dos fármacos para enfermidades cardiovasculares en condicións máis realistas”. Para iso, deseñarán e fabricarán unha tecnoloxía avanzada de vaso sanguíneo nun chip que reproduza o fluxo continuo dos vasos sanguíneos humanos, para despois analizar a súa resposta a unha serie de fármacos coñecidos.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.